27 February, 2020 12:42 PM IST | Mumbai Desk
રમતાં-રમતાં વાગી જાય તો બાળકો તરત જ લોકોનું ધ્યાન આકર્ષવાની કોશિશ કરતાં હોય છે. જોકે આ આદત માત્ર બાળકોમાં જ નહીં, પરંતુ મોટાઓમાં પણ જોવા મળતી હોય છે, પણ સ્કોટલૅન્ડની આ મહિલા ફુટબોલરે ભારે કરી!
ફુટબૉલ રમતી વખતે હરીફ ખેલાડીને કારણે સ્કોટિશ ફુટબૉલ ટીમ સેન્ટ મિરનની કૅપ્ટન જેન ઑ’ટુલની ની-કૅપ (ઢીંચણની વાટકી) ખસી ગઈ. જોકે જરાય હિંમત હાર્યા વિના તેણે ખસી ગયેલી ઢાંકણીને થપ્પડ મારે એ રીતે મારી ફરી એના સ્થાને ગોઠવી દીધી અને જાણે કાંઈ બન્યું જ નથી એમ રમવા લાગી. આ રીતે તેણે લગભગ ૯૦ મિનિટ જેટલા સમયની ગેમ પૂરી કરી.
આ વિડિયો ક્લિપ સેન્ટ મિરન ડબ્લ્યુએફસી દ્વારા ટ્વિટર પર શૅર કરવામાં આવી હતી જેના માટે જેન ઑ’ટુલ આઇસીટી સામે ફુટબૉલ મૅચ રમી રહી હતી. વિડિયોના કૅપ્શનમાં લખ્યું હતું કે અમારી કૅપ્ટન જેન ઑ’ટુલ મજબૂત મનની મહિલા છે. આવી મહિલાને તમે તોડી ન શકો. આ ક્લિપે ઘણાને અચંબિત કર્યા છે તો અનેક લોકોએ જેન ઑ’ટુલ માટે આદર વ્યક્ત કર્યો છે.