20 November, 2021 06:46 PM IST | mumbai | Gujarati Mid-day Correspondent
લંડનમાં ગુફા જેટલા ઘરના પહાડ જેવડા ભાવ
ઇંગ્લૅન્ડની પાટનગરી અને વિશ્વનાં મહત્ત્વનાં શહેરોમાંનું એક લંડન તોતિંગ ભાવ માટે જાણીતું છે જ. અહીં નાનાં-નાનાં ઘરનાં ભાડાં પણ મોંઘાંદાટ હોવાની બુમરાણ મચતી હોય છે. તાજેતરમાં ભાડા માટે મુકાયેલાં આવાં જ ત્રણ નાનાં ઘરની ચર્ચા જામી છે, કારણ કે ખિસ્સાફાડ ભાડું ઉઘરાવીને પણ આ ઘરમાં ટૉઇલેટ-બાથરૂમની સુવિધા છે કે નહીં એ વિશે સ્પષ્ટતા નથી કરવામાં આવી.
પશ્ચિમ લંડનમાં કૅસલટાઉન રોડ પર આવેલા એક બિલ્ડિંગના ત્રણ નાના સ્ટુડિયો-ફ્લૅટ વેચવા મુકાયા છે. એક ફ્લૅટમાં તો કિચનને અડીને જ શાવર મૂકેલો દેખાય છે, કહેવાતા લિવિંગરૂમમાં મૂકેલા પલંગ પરથી પગ સીધો કિચનમાં મૂકીને ઊતરી શકાય છે. માંડ ૧૦X૧૨ના આ ઘરમાં ટૉઇલેટ હોવાના કોઈ સંકેત દેખાતા નથી અને એ વિશે ‘રાઇટમૂવ’ નામની વેચનારી કંપનીએ કોઈ ઉલ્લેખ પણ નથી કર્યો. મહિને ૮૭૫ યુરો (આશરે ૭૩,૦૦૦ રૂપિયા)ના ભાડે મુકાયેલા આ ફ્લૅટમાં કિચન સાથે જ જોડાયેલા લાગતા શાવરની આસપાસ બાથરૂમનો દરવાજો પણ નથી દેખાતો. કદાચ સવારે બ્રેકફાસ્ટ બનાવતાં-બનાવતાં નાહવાની સુવિધા કરવામાં આવી હોય એવું લાગે. એ જ કંપનીએ આ જ અપાર્ટમેન્ટના આવા જ બીજા બે અદ્ભુત સ્ટુડિયો-ફલૅટ પણ ભાડે મૂક્યા છે. એવો જ બીજો (ટૉઇલેટવિહોણો) ફ્લૅટ આ બિલ્ડિંગમાં ૧૫૦૦ યુરો (આશરે સવા લાખ રૂપિયા)માં ભાડે મુકાયો છે.