23 September, 2021 12:09 PM IST | Mumbai | Gujarati Mid-day Correspondent
મધ્ય પ્રદેશમાં પ્રેમી પંખીડાંઓને તાલિબાની સજા
અફઘાનિસ્તાનમાં તાલિબાનના આતંકવાદીઓ સ્થાનિક લોકો પર અત્યાચાર કરતા હોવાના અહેવાલો વારંવાર આવતા હોય તો એની અન્યત્ર કોઈ દેશમાં સહેજ અસર તો જોવા મળે જ. જુઓને, ભારતમાં જ આવું બની ગયું. મધ્ય પ્રદેશના ધાર જિલ્લામાં પ્રેમી જોડાને તાલીબાની સજા આપવાનો કિસ્સો બહાર આવ્યો છે. કુંડી ગામમાં બે છોકરીઓ અને છોકરાઓના ગળામાં ટાયર બાંધીને તેમને નાચવા માટે મજબૂર કરવામાં આવ્યાં હતાં. પોલીસે આ બનાવમાં ત્રણ જણ સામે કેસ નોંધીને તેમની ધરપકડ કરી છે.
આ પ્રેમી પંખીડાં ઘરેથી નાસી જતાં રોષે ભરાયેલા તેમના પરિવારજનોએ તેમના ગળામાં ટાયર નાખીને અને તેમના માથે લાકડીઓ મૂકીને તેમને નાચવા માટે મજબૂર કર્યાં હતાં. પ્રેમી પંખીડાંને ભગાડવામાં એક સગીર યુવતીએ મદદ કરી હોવાની પરિવારજનોને શંકા હતી એટલે તેને પણ નાચવાની ફરજ પડાઈ હતી.
શરમજનક વિડિયો સોશ્યલ મીડિયા પર વાઇરલ થયો છે. આ વિડિયોમાં કેટલાક લોકો આ યુવાનો પર લાકડીથી હુમલો કરી તેમને ત્રાસ આપી રહેલા પણ જોવા મળે છે.