04 February, 2021 07:15 AM IST | Mumbai
જૉસેફ ફ્લાવિલ
આખી દુનિયા કોરોનાના કહેરની અસરમાંથી હજી બહાર નથી આવ્યું ત્યારે બ્રિટનના સ્ટૅફૉર્ડશર રાજ્યના બર્ટન ટાઉનમાં ૧૯ વર્ષના જૉસેફ ફ્લાવિલને કોરોના કઈ બલા છે એની ખબર જ નથી. વાત એમ છે કે ભાઈનો ૧૧ મહિના પહેલાં ઍક્સિડન્ટ થયો હતો. એક કારે ટક્કર મારતાં તેને હૉસ્પિટલમાં દાખલ કરવામાં આવ્યો હતો અને ત્યાં સારવાર દરમ્યાન તે કોમામાં સરી પડ્યો હતો. આ દુર્ઘટના બ્રિટનમાં લૉકડાઉન લાગુ થયાના લગભગ ત્રણ અઠવાડિયાં પહેલાં એટલે કે પહેલી માર્ચે થઈ હતી.
હાલમાં જ જૉસેફ કોમામાંથી બહાર આવ્યો છે અને આ સમયગાળામાં વિશ્વમાં થયેલા ફેરફારોથી તે તદ્દન અજાણ છે. જૉસેફને કોમામાંથી બહાર આવેલો જોઈ આનંદિત થયેલા તેના પરિવારજનો તેને કોવિડને કારણે વિશ્વમાં થયેલા ફેરફાર વિશે તેને કઈ રીતે જાણ કરવી, લૉકડાઉન અને સોશ્યલ ડિસ્ટન્સિંગની આવશ્યકતા વિશે કેમ સમજાવવું તે માટે અવઢવમાં છે.
કોરોના વાઇરસ પ્રતિબંધોને કારણે તેના પરિવારજનો તેને મળવા જઈ શકતા નથી. જૉસેફ કોરોના વાઇરસની મહામારીથી ભલે અજાણ હોય પરંતુ તે જ્યારે કોમામાં હતો ત્યારે તેનો કોવિડ-19 રિપોર્ટ પૉઝિટિવ આવ્યો હતો તેમ જ કોમામાંથી બહાર આવ્યા પછી પણ તેનો ટેસ્ટ-રિપોર્ટ પૉઝિટિવ આવ્યો હતો.