શોરૂમે સ્ટ્રીટ –ડૉગને દત્તક લીધો અને એને સેલ્સમેન બનાવી દીધો

શોરૂમે સ્ટ્રીટ –ડૉગને દત્તક લીધો અને એને સેલ્સમેન બનાવી દીધો

સેલ્સમેનના રૂપમાં ડૉગી

જસ્ટ કલ્પના કરો, તમે કોઈ કારના શો-રૂમમાં જાઓ અને તમારું સ્વાગત સેલ્સમૅનને બદલે એક ડૉગી કરે તો? અને એ ડૉગીના ગળામાં જે-તે કંપનીના કર્મચારીનો ટૅગ પણ લાગેલો હોય તો? આવી જ ઘટના ઘટી છે બ્રાઝિલમાં હ્યુન્દેઈના એક શોરૂમમાં. આ ડૉગીનું નામ છે ટસ્કન પ્રાઇમ. હ્યુન્દેઈના એ શોરૂમે શેરીમાં રખડતા એક ડૉગીને દત્તક લઈ લીધો છે. વાત એમ છે કે આ ડૉગી શો-રૂમની બહાર ભટક્યા કરતો હતો. રોજ આવવાને કારણે તેણે અહીંના કર્મચારીઓ સાથે સારીએવી દોસ્તી કરી લીધેલી. એ પછી તો તે જ્યારે શોરૂમ ખુલ્લો હોય ત્યારે અંદર જ બાઅદબ બેસી જતો અને કસ્ટમર્સની આગળપાછળ ફરતો રહેતો. તેનો સાલસ અને મિલનસાર સ્વભાવ જોઈને શોરૂમના લોકોએ તેને પણ અહીંનો જ કર્મચારી બનાવી દીધો. તેના માટે ખાસ એમ્પ્લોઇનો બિલ્લો બનાવ્યો અને તેના ગળામાં પહેરાવી દીધો. મે મહિનામાં આ ઘટનાએ આકાર લીધો અને ત્યારથી આ શોરૂમના સેલ્સમેનની જેમ આવનાર દરેક વ્યક્તિનું સ્ક્રીનિંગ કરીને આવકારે છે. શોરૂમના મૅનેજરનું કહેવું છે કે એને કારણે હવે શોરૂમમાં સેફ્ટીની ચિંતા ઘટી ગઈ છે.