12 October, 2020 07:52 AM IST | America | Gujarati Mid-day Correspondent
બાસ્કેટબૉલ પ્લેયર માઇકલ જૉર્ડન
અમેરિકાના ભૂતપૂર્વ પ્રમુખ બરાક ઓબામા અને મિશેલ ઓબામા ઉપરાંત બાસ્કેટબૉલ પ્લેયર લેબ્રોન જેમ્સનાં હૂબહૂ ચિત્રો દોરીને ફેમસ થઈ ગયેલા ચિત્રકાર કીગન હૉલે આ વખતે ફરી એક વાર તેની ચિત્રકળાથી સોશ્યલ મીડિયા પર તહલકો મચાવ્યો છે.
તાજેતરમાં તેણે બાલ્કેટબૉલ પ્લેયર માઇકલ જૉર્ડનનાં ચિત્રો માત્ર પેન્સિલ દ્વારા દોરીને એ સોશ્યલ નેટવર્કિંગ સાઇટ ઇન્સ્ટાગ્રામ પર મૂક્યાં છે જે જબરદસ્ત લોકપ્રિય થયાં છે. આ ચિત્ર કોઈ એકાદ વ્યક્તિનું પૉર્ટ્રેટ નહીં, પણ એક ફોટોગ્રાફનું અદ્દલોઅદ્દલ ચિત્રણ છે. એક ફોટોગ્રાફ પરથી રચેલા ચિત્રમાં માઇકલ જૉર્ડન મેદાનમાં પૉઇન્ટ સ્કોર કરવા માટે છલાંગ લગાવે છે અને એ વખતે દર્શકો પણ તેને ચિયર કરવા માટે ઊભા થઈ ગયેલા હોય એવી તસવીરની નકલ તૈયાર કરી છે. આ તસવીરનું ચિત્રણ કરવા માટે કીગલે ૨૫૦ કલાકની મહેનત કરી હતી. આ તમામ કલાકોની મહેનતનો તેણે ટાઇમલૅપ્સ વિડિયો તૈયાર કરીને એ પણ ઇન્સ્ટાગ્રામ પર મૂક્યો છે. આ વિડિયો જોઈને ભલભલી વ્યક્તિ કળાકારની કાબેલિયત પર ઓવારી જાય એમ છે.