05 October, 2020 07:31 AM IST | America | Gujarati Mid-day Correspondent
નરકના મેયર બનવાની ઑફર આપી છે આ ભાઈએ
અમેરિકાના મિશિગન સ્ટેટમાં HELL નામે નાનકડું નગર છે અને જૉન કોલોન નામનો એક સ્થાનિક માણસ આપમેળે એ નગરનો મેયર બની બેઠો છે. નગરના નામનો અર્થ થાય છે નરક, પણ એમાં કોઈ નરક જેવા અનુભવો નથી થતા. જુદા કારણસર અને જુદા અર્થમાં એ નગરનું ચોક્કસ પ્રકારનું નામ પાડવામાં આવ્યું છે. આ નગરમાં હજી સત્તાવાર રીતે મેયરની નિમણૂકની જોગવાઈ કરવામાં આવી નથી. એવા સમયે જૉનભાઈ જાતે બની બેઠેલા મેયર છે. આ ભાઈએ તો અન્યોને પણ ટૂંકા ગાળા માટે HELLનું મેયરપદ ઑફર કર્યું છે અને સાથે હેલોવીન પાર્ટીઝ માટે પોતાનું ઘર પણ ભાડે આપે છે. એથી મહેમાનોને થોડા દિવસો કે મહિના માટે મેયરપદ ઑફર કરવામાં આવે છે. નગરના પ્રવેશ તથા અન્ય સ્થળો પર હેલોવીન થીમને અનુકૂળ આવે એવા ગૉથિક આર્ટનાં બાંધકામો જોવા મળે છે. એક રાતના ૩૧ ડૉલર (અંદાજે ૨૩૦૦ રૂપિયા)ના ભાડા પર ત્રણ રાતના સ્ટે સાથે મેયરસાહેબનું ઘર ૧૪ ઑક્ટોબરથી હેલોવીન પાર્ટી માટે ઉપલબ્ધ છે. જોકે આ ઑફર પણ મિશિગન સ્ટેટના રહેવાસી અને જૉન કોલોનના પરિવાર કે પરિચિત લોકોને માટે જ છે.