23 January, 2020 09:06 AM IST | Pakistan
અરબાબ ખીજર હયાત
જીવનસાથી વિશે દરેકની પોતાની કલ્પના હોય છે. જોકે લગ્નની વય થાય એટલે માતા-પિતા કે સગાંસંબંધીની સમજાવટથી કે પછી પરિસ્થિતિ સાથે સમાધાન કરીને મોટા ભાગના લોકો બાંધછોડ કરી લે છે. જોકે પાકિસ્તાનના ૨૭ વર્ષના ૪૪૪ કિલો વજન ધરાવતા વેઇટલિફ્ટર અત્યાર સુધીમાં લગભગ ૩૦૦ કરતાં વધુ માગાં ઠુકરાવી ચૂક્યા છે, કારણ માત્ર એટલું કે તેમને ઓછામાં ઓછી ૧૦૦ કિલો વજન ધરાવતી યુવતી સાથે લગ્ન કરવાં છે.
ખૈબર પખ્તૂન્વા જિલ્લાના મરદાનમાં રહેતા અરબાબ ખીજર હયાતના પરિવારજનોનું માનવું છે કે ૧૦૦ કિલો કરતાં ઓછા વજનની યુવતી સાથે અરબાબની જોડી સારી નહીં લાગે. વળી અરબાબનું કદ ૬.૬ ફીટ હોવાથી પરિવારજનો યુવતીની હાઇટ પણ ૬.૪ ફીટ જેટલી હોય એવી ઇચ્છા રાખે છે.
દુનિયાના સૌથી શક્તિશાળી માણસ બનવાની ચાહતમાં અરબાબે કિશોરાવસ્થાથી જ પોતાનું વજન વધારવાની શરૂઆત કરી હતી. આખું પાકિસ્તાન તેને સ્ટાર માને છે અને પાકિસ્તાનની બહાર પણ ઘણા લોકો તેને ઓળખે છે. થોડા સમય પહેલાં અરબાબે એક ટ્રૅક્ટરને રસ્સીથી બાંધીને ખેંચ્યા બાદ તે લાઇમલાઇટમાં આવ્યો હતો.