23 November, 2023 08:05 AM IST | Ahmedabad | Gujarati Mid-day Correspondent
ઘોલ ફિશ ગુજરાત અને મહારાષ્ટ્રના દરિયાઈ વિસ્તારમાં મળી આવે છે
અમદાવાદમાં યોજાયેલી ગ્લોબલ ફિશરીઝ કૉન્ફરન્સ ૨૦૨૩માં ગુજરાતના મુખ્ય પ્રધાન ભૂપેન્દ્ર પટેલે ઘોલ ફિશને ગુજરાતની રાજ્ય ફિશ જાહેર કરી હતી. આ ઇવેન્ટમાં અનેક મહાનુભાવોએ હાજરી આપી હતી.
ઘોલ ફિશ ગુજરાત અને મહારાષ્ટ્રના દરિયાઈ વિસ્તારમાં મળી આવે છે અને ભારતમાં ઉપલબ્ધ એવી લાંબામાં લાંબી ફિશમાં એનો સમાવેશ થાય છે. ગોલ્ડ ફિશનો રંગ સોનેરી બદામી હોય છે. ઘોલ ફિશ બહુ જ કીમતી ગણાય છે અને એના મીટ તથા ઍર બ્લેડરના કારણે એની માગ બહુ વધુ હોય છે. ઘોલ ફિશનો ઉપયોગ બિયર અને વાઇન બનાવવા માટે થાય છે અને ઍર બ્લેડરનો ઉપયોગ ફાર્માસ્યુટિકલ્સમાં થાય છે. ઘોલ ફિશની લંબાઈ દોઢ મીટર જેટલી હોય છે અને લંબાઈ જેટલી વધુ એટલી એની કિંમત વધુ હોય છે. આ પ્રસંગે હાજર રહેલા કેન્દ્રીય પ્રધાન પુરુષોત્તમ રૂપાલાએ કહ્યું હતું કે અગાઉ અન્ય રાજ્યોએ પણ પોતપોતાના રાજ્યની વિશેષ ફિશનાં નામ જાહેર કર્યાં હતાં. કહેવાય છે કે ચોક્કસ ઉંમરની અને પુખ્ત બાંધો ધરાવતી એક ફિશની કિંમત પાંચ લાખ રૂપિયાથી શરૂ થાય છે.
