ડાંગરના ખેતરને જીવાતથી મુક્ત રાખવા થાઇલૅન્ડના ખેડૂતો કરે છે બતકનો ઉપયોગ

ખેતરોમાં ફરતાં બતક મોટા ભાગે ખાકી કૅમ્પબેલ નામની પ્રજાતિનાં બતક હોય છે

બતકની સેના

થાઇલૅન્ડના ખેડૂતો લણણી પછી ડાંગરના ખેતરમાં ૧૦,૦૦૦ બતકની સેનાને છુટ્ટી મૂકી દે છે. થાઇલૅન્ડ અને આસપાસના દેશોમાં લાંબા સમયથી ચોખાના પાકને ગોલ્ડન ઍપલ સ્નેઇલ્સ જેવી જીવાતથી મુક્ત કરવા તથા બતકના ખોરાકનો ખર્ચ ઓછો કરવા આ પરંપરાનું પાલન કરવામાં આવે છે. આ પરંપરાનો અભ્યાસ કરતાં જણાયું છે કે એ પર્યાવરણ માટે લાભકારી હોવા ઉપરાંત પાકની ઊપજ પણ સારી થાય છે.

આ બતક જમીનને સમથળ બનાવવા માટે ડાંગરની પરાળી પર પણ પગ મૂકે છે, જેના કારણે જમીન પર હળ ચલાવવાનું સહેલું થઈ પડે છે. આ ઉપરાંત આ પરંપરા ખેડૂતોને જંતુનાશકનો ઉપયોગ કરતાં પણ રોકે છે. આ પરંપરાને કારણે બતક તેમનું આખું જીવન ફૅક્ટરી ફાર્મ પર વિતાવવાના સ્થાને નાનાં ખેતરોમાંથી ખોરાક મેળવે છે.

ખેતરોમાં ફરતાં બતક મોટા ભાગે ખાકી કૅમ્પબેલ નામની પ્રજાતિનાં બતક હોય છે. તેઓ ૨૦ દિવસનાં થાય ત્યારથી તેમને એક ખેતરમાંથી બીજા ખેતરમાં ફેરવવામાં આવે છે. લગભગ પાંચથી છ મહિનાના બાદ આ બતક એના સંવર્ધકના ખેતરમાં પાછાં ફરે છે, જ્યાં તે થોડાં વર્ષ ઈંડાં મૂકે છે. એ પછી એને વેચી દેવામાં આવે છે. જોકે આ બતક H5N1 એવિયન ફ્લુના વાહક હોવાનું જણાયું છે.