કન્યા લગ્નનાં મંડપમાં પણ પુશઅપ્સ કરવાનું ન ચૂકી

મૉડલ અને ડાયેટિશ્યન આના અરોરાએ વ્યાયામ દ્વારા આરોગ્ય જાળવવાનું મહત્ત્વ સમજાવવા માટે સરસમજાનો વિડિયો સોશ્યલ નેટવર્કિંગ સાઇટ ઇન્સ્ટાગ્રામ પર પોસ્ટ કર્યો હતો

લગ્નનાં મંડપમાં પુશઅપ્સ કરતી કન્યા

ભારતના લગ્ન સમારંભોના જોરદાર જલસા, શોરબકોર અને ધમાલ હાલની મહામારીમાં ઓછા થયા છે. સાદગીથી લગ્નોનું પ્રમાણ વધ્યું છે, પરંતુ રીતરિવાજો પ્રસંગને જીવંત બનાવે એ બાબતની સાવ બાદબાકી થઈ નથી. ઇન્ડિયન મૅરેજ થોડાં તોફાન-મસ્તી અને મોજથી યાદગાર તો બને જ છે, પણ એક લગ્ન સાવ અનોખા કારણસર યાદગાર બન્યાં છે.

મૉડલ અને ડાયેટિશ્યન આના અરોરાએ વ્યાયામ દ્વારા આરોગ્ય જાળવવાનું મહત્ત્વ સમજાવવા માટે સરસમજાનો વિડિયો સોશ્યલ નેટવર્કિંગ સાઇટ ઇન્સ્ટાગ્રામ પર પોસ્ટ કર્યો હતો. એ વિડિયોમાં ભારતના એક પરિવારની કન્યા પોતાનાં લગ્નના દિવસે મંડપમાં બેસતાં પહેલાં કસરત કરવાનું ચૂકતી નથી. તેને મોંઘો અને વજનમાં ભારે ‘લહેંગા’ તેમ જ બધા દાગીના પહેરીને પુશઅપ્સ કરી રહેલી વિડિયોમાં બતાવાઈ છે. ઇન્સ્ટાગ્રામના પાંચ લાખ કરતાં વધારે નેટિઝન્સે આ વિડિયો લાઇક કર્યો છે. સેંકડો લોકોએ કમેન્ટ્સમાં વ્યાયામ દ્વારા આરોગ્ય જાળવવાની કન્યાની કટિબદ્ધતા અને પ્રતિબદ્ધતાની ભરપુર પ્રશંસા કરી છે.