09 August, 2022 11:41 AM IST | Mumbai | Gujarati Mid-day Correspondent
તસવીર સૌજન્ય : સોશ્યલ મીડિયા
પ્રાણીઓનો કોઈ સુંદર વિડિયો હોય કે કોઈ વ્યક્તિએ કરેલી નવીનતમ શોધની વાત હોય, સોશ્યલ મીડિયા પર એનો વિડિયો શૅર કરવામાં મહિન્દ્ર ગ્રુપના ચૅરમૅન આનંદ મહિન્દ્ર હંમેશાં આગળ રહ્યા છે. તાજેતરમાં તેમણે એક ઓરાંગઉટાંગ વાનરનો વિડિયો શૅર કર્યો છે, જેણે નેટિઝન્સનું મન મોહી લીધું છે. વિડિયોમાં ઓરાંગઉટાંગ વાઘનાં ત્રણ બચ્ચાંઓ સાથે ગેલ કરી રહ્યો છે અને એક વાઘના બચ્ચાને બૉટલથી દૂધ પીવડાવી રહ્યો છે.
વિડિયો-ક્લિપમાં ઓરાંગઉટાંગ વાઘના નાના બચ્ચાને બૉટલથી દૂધ પિવડાવીને પછી એક માની જેમ એની સાથે ગેલગમ્મત કરી રહ્યો છે. વિડિયોની કૅપ્શનમાં તેમણે લખ્યું છે, ‘ઘણી વાર તમને લાગે કે તમારાં બચ્ચાં તમારાથી ઘણાં જુદાં પડે છે, છતાં તમે તેને પ્રેમ કરો છો.’
થોડા કલાક પહેલાં કરાયેલી આ પોસ્ટને અત્યાર સુધી ૯૦,૦૦૦ કરતાં વધુ વ્યુઝ અને ૫૦૦૦ કરતાં વધુ લાઇક્સ મળી છે.