કેરલાના પૂરગ્રસ્ત વિસ્તારમાં વર-વધૂ રસોઈના તપેલાને હોડી બનાવીને મૅરેજ-હૉલ પહોંચ્યાં

મર્યાદિત સંખ્યામાં સંબંધીઓ સાથે આ લગ્ન કરાયાં હતાં

રસોઈના તપેલાને હોડી બનાવીને મૅરેજ-હૉલ પહોંચતા વર-વધૂ

છેલ્લા ત્રણેક દિવસથી ભારે વરસાદને કારણે કેરલા પૂરગ્રસ્ત છે. લોકો પૂરનાં પાણીથી બચવાની કોશિશ કરતા હોય એવામાં લગ્ન લખાયાં હોય તો લગ્નસ્થળ સુધી પહોંચવાનું કામ ખૂબ કપરું હોય છે. જોકે એક વખત ધારી લીધું કે ગમે તેમ કરીને નિર્ધારિત સ્થળે પહોંચવું છે તો પછી તેને કોઈ રોકી શકતું નથી.

પૂરના સમાચાર વચ્ચે પણ એક સમાચાર એવા મળ્યા છે જે વાંચીને પીડા વચ્ચે પણ નાનીશી સ્માઇલ આવી જાય. હકીકતમાં આકાશ અને ઐશ્વર્યા નામના આ  યુગલ જે બન્ને હેલ્થ વર્કર્સ છે તેઓ ગઈ કાલે પોતાના લગ્નસ્થળે પહોંચવા માટે રસોઈના મોટા ઍલ્યુમિનિયમના તપેલામાં બેસીને પહોંચ્યાં હતાં.

બન્નેનાં લગ્ન શરૂઆતમાં થાલાવડી ખાતે આવેલા એક મંદિરમાં થવાનાં હતાં, પરંતુ હૉલમાં પાણી ભરાયેલાં હતાં. મર્યાદિત સંખ્યામાં સંબંધીઓ સાથે આ લગ્ન કરાયાં હતાં. બન્નેએ જણાવ્યું કે અમારાં લગ્ન સોમવારે થયાં હતાં. બે દિવસ પહેલાં તેઓ જ્યારે મંદિરમાં આવ્યાં ત્યારે બિલકુલ પાણી ભરાયાં નહોતાં, પરંતુ ત્રણ દિવસના અવિરત વરસાદને કારણે માંદિરમાં પાણી ભરાઈ ગયાં હતાં અને તેઓ વધુ વિલંબ કરવા માગતાં ન હોવાથી તેમણે ઓછા આમંત્રિતો સાથે લગ્ન પાર પાડ્યાં હતાં.