આ બાળક ‘ચાઇલ્ડ ઇન્ફ્લુઅન્સર’ તરીકે ૬ આંકડામાં કમાણી કરે છે

ઓમરી મૅક્વિને વીગન શેફ અને ઇન્ફ્લુઅન્સર તરીકે પોતાનું આખું સામ્રાજ્ય બનાવ્યું છે

ઓમરી મૅક્વિન

બાળકોના જીવનમાં ૧૩ વર્ષની ઉંમર બાલ્યાવસ્થા અને કિશોરાવસ્થા વચ્ચેની ઉંમર છે. આ વયના બ્રિટનના એક બાળક ઓમરી મૅક્વિને માત્ર આઠ વર્ષની ઉંમરે સોશ્યલ મીડિયા પર એકાઉન્ટ શરૂ કર્યા પછી એક વીગન શેફ અને ઇન્ફ્લુઅન્સર તરીકે પોતાનું આખું સામ્રાજ્ય બનાવ્યું છે. ઓમરી મૅક્વિને વિવિધ સાહસ કર્યાં છે; જેમાં છોડ આધારિત ભોજન, ડીપ્સ અને જૂસ વેચનારી શાકાહારી કંપની ડિપાલિશિયસનો પણ સમાવેશ છે. આ ઉપરાંત ઓમરી ગોઝ નામની તેની પોતાની યુટ્યુબ ચૅનલ પણ છે. ઓમરી મૅક્વિનના ઇન્સ્ટાગ્રામના ૨૮,૨૦૦ ફૉલોઅર્સ છે. ‘ગુડ મૉર્નિંગ બ્રિટન’ના શોમાં તેની મમ્મી લેહ મૅક્વિને જણાવ્યું હતું કે ડિસ્લેક્સિયાને કારણે તેને સ્કૂલ જવામાં ભારે મુશ્કેલી પડતી હોવાથી તે પ્રાઇવેટ સ્કૂલના ક્લાસિસ ઑનલાઇન ભરે છે. ઓમરી મૅક્વિ​નની મમ્મી લેહે જણાવ્યું હતું કે ઓમરી એક વીગન શેફ છે અને તેનું મિશન પ્રાણીઓને નુકસાન પહોંચાડ્યા વિનાના ભોજન પ્રત્યે લોકોને વાળવાનું છે અને એ માટે તે તેની વિવિધ ચૅનલ ચલાવે છે, પૈસા માટે નહીં.