05 December, 2020 08:24 AM IST | Mumbai | Mumbai correspondent
પેટના દુખાવાને બદલે વાળ વધારવાની દવા અપાતાં ૨૦ બાળકોના આખા શરીર પર વાળ
સ્પેનનાં ૨૦ બાળકોના શરીર પર અચાનક જ વેરવુલ્ફ સિન્ડ્રૉમનાં ચિહ્નો જોવા મળ્યાં હતાં. અચાનક જ આ બાળકોના હાથ, પગ, પીઠ તેમ જ છાતી પર મળી લગભગ આખા શરીરે વાળ ઊગવા માંડ્યા હતા. આમ થવાનું કારણ તપાસતાં અજીબ હકીકત બહાર આવી હતી.
વાસ્તવમાં પેટના દુખાવાની ફરિયાદ લઈને ડૉક્ટર પાસે ગયેલાં આ બાળકોને જે દવા આપવામાં આવી એમાં પેટની તકલીફ માટે આપવામાં આવતી ઓમેપ્રોઝોલને બદલે વાળના વિકાસને ઉત્તેજિત કરતા મિનોક્સિડિલ નામની દવા આપવામાં આવી હતી. હકીકતમાં કૅપ્સ્યૂલ ગળી શકે એટલાં મોટાં બાળકો ન હોવાથી તેમને સીરપના ફૉર્મમાં દવા આપવામાં આવી હતી અને દવા બનાવનારી કંપનીની ભૂલને કારણે ગ્રેનેડા અને વેલેન્સિયાની ફાર્મસીમાં બૉટલ પરના લેબલિંગમાં ગોટાળાવાળી દવા પહોંચવાને કારણે આ તકલીફ થઈ હતી. જે બાળકોમાં આ તકલીફ જોવા મળી છે તેઓના વાળ વધવાની સમસ્યા હજી પણ છે.