19 May, 2026 02:19 PM IST | Uttar Pradesh | Gujarati Mid-day Correspondent
લખનઉમાં રેલવેના સ્લીપર-કોચમાંથી લાવારિસ મળેલી પેટીનું તાળું તોડતાં એમાંથી પાંચ ટુકડામાં કપાયેલું ધડ મળ્યું હતું. પાસેની કપડાની બૅગમાં શબનું માથું હતું.
ઉત્તર પ્રદેશની રાજધાની લખનઉમાં બિહારના છપરાથી લખનઉ પહોંચેલી ગોમતીપુર એક્સપ્રેસ ટ્રેનની બૉગીમાં સફાઈકામ દરમ્યાન લાવારિસ પડેલા સામાનમાંથી એક યુવતીનું શબ મળ્યું હતું. ટ્રેન રોકાયા પછી સફાઈ-કામદારો ટ્રેનની સફાઈ કરી રહ્યા હતા ત્યારે તેમને એક લાવારિસ પેટી પડેલી મળી હતી. પેટીને તાળું મારેલું. એ તાળું તોડતાં એમાંથી મહિલાનું ધડ પાંચ ટુકડામાં કપાયેલું પડ્યું હતું. જોકે એમાં માથું નહોતું. માથું નજીકમાં જ પડેલી બીજી કપડાની હૅન્ડબૅગમાં પ્લાસ્ટિકમાં વીંટાળેલી હાલતમાં નીકળ્યું હતું. આ શબ પચીસથી ૩૦ વર્ષની વયની યુવતીનું હોય એવું લાગે છે. આ કોણ છે એની ઓળખ કરવાનું કામ પોલીસે શરૂ કર્યું છે. ગોમતીપુર એક્સપ્રેસ છપરાથી નીકળીને ૨૦ સ્ટેશનો પાર કરીને ૧૨ કલાકમાં લખનઉ પહોંચે છે. કયા સ્ટેશન પરથી આ સામાન ટ્રેનમાં આવ્યો અને કોણ લઈ આવ્યું એની તપાસ કરવા માટે ૩ ટીમ તૈયાર કરવામાં આવી છે.
