09 October, 2025 09:16 PM IST | Tamil Nadu | Gujarati Mid-day Online Correspondent
ઇન્ડિયન મેડિકલ એસોસિએશન (IMA) ના પ્રમુખ ડૉ. અલ્પના શુક્લાએ અન્ય IMA અને IDA ડૉકટરો સાથે કફ સિરપથી થતા મૃત્યુના મુદ્દા પર કાળી પટ્ટી પહેરીને વિરોધ કર્યો
મધ્યપ્રદેશમાં ઝેરી કફ સિરપ ‘કોલ્ડ્રિફ’નો મૃત્યુઆંક વધ્યો છે. ગુરુવારે, નાગપુર મેડિકલ કૉલેજમાં સારવાર દરમિયાન પારસિયાના એક વર્ષના ગર્વિક પવારનું મૃત્યુ થયું. આ સાથે છિંદવાડા જિલ્લામાં મૃત્યુઆંક 20 થયો છે. બેતુલમાં બે અને પાંધુર્નામાં એક બાળકના મૃત્યુ સાથે, રાજ્યભરમાં માર્યા ગયેલા બાળકોની કુલ સંખ્યા 23 પર પહોંચી ગઈ છે. રાજસ્થાનમાંથી પણ ત્રણના મોત નોંધાયા છે. હાલમાં પાંચ બાળકોની હાલત ગંભીર છે. આ કેસમાં એક મોટી કાર્યવાહીમાં, SIT એ ચેન્નઈથી શ્રીસન ફાર્મા કંપનીના ડિરેક્ટર ગોવિંદન રંગનાથનની ધરપકડ કરી છે. ટીમે બુધવારે રાત્રે તેના ઠેકાણા પર દરોડો પાડીને તેને પકડી લીધો હતો. રંગનાથન તેની પત્ની સાથે ફરાર હતો અને તેના માથા પર 20,000 રૂપિયાનું ઈનામ જાહેર કરવામાં આવ્યું હતું. છિંદવાડા પોલીસ અધિક્ષક અજય પાંડેએ જણાવ્યું હતું કે આરોપીને ચેન્નઈની સૈદાપેટ મેટ્રોપોલિટન મેજિસ્ટ્રેટ કોર્ટમાં રજૂ કરવામાં આવ્યો હતો, જ્યાં ટ્રાન્ઝિટ રિમાન્ડ માગવામાં આવી. તપાસ ટીમે કંપનીમાંથી ઉત્પાદન રેકોર્ડ, દવાના નમૂનાઓ અને અન્ય જરૂરી દસ્તાવેજો જપ્ત કર્યા છે. ચેન્નઈ-બૅન્ગલુરુ હાઇવે પર રંગનાથનનું એપાર્ટમેન્ટ સીલ કરી દેવામાં આવ્યું છે, જ્યારે કોડમ્બક્કમમાં તેમની રજિસ્ટર્ડ ઑફિસ બંધ મળી આવી છે.
દરમિયાન, મુખ્ય પ્રધાન ડૉ. મોહન યાદવ ગુરુવારે નાગપુર પહોંચ્યા અને હૉસ્પિટલમાં દાખલ બાળકો સાથે મુલાકાત કરી. તેમણે તેમના પરિવારો સાથે વાત કરી અને તેમને શક્ય તમામ સહાયની ખાતરી આપી. અંબિકા વિશ્વકર્મા હાલમાં ન્યૂ હેલ્થ સિટી હૉસ્પિટલમાં દાખલ છે, જ્યારે કુણાલ અને હર્ષ યદુવંશી નાગપુર એઈમ્સમાં સારવાર લઈ રહ્યા છે. સુપ્રીમ કોર્ટે પણ આ મામલાની નોંધ લીધી છે. વકીલ વિશાલ તિવારી દ્વારા દાખલ કરાયેલી જાહેર હિતની અરજીની સુનાવણી શુક્રવારે થશે. અરજીમાં માગ કરવામાં આવી છે કે આ કેસની તપાસ સીબીઆઈ અથવા રાષ્ટ્રીય ન્યાયિક પંચની નિષ્ણાત ટીમ દ્વારા કરવામાં આવે.
આ કૌભાંડ અંગે આંતરરાષ્ટ્રીય સ્તરે પણ ચિંતા વ્યક્ત કરવામાં આવી છે. વિશ્વ આરોગ્ય સંગઠન (WHO) એ ભારત સરકારને પૂછ્યું છે કે શું મૃત્યુનું કારણ બનેલી કફ સીરપ વિદેશમાં નિકાસ કરવામાં આવી હતી? તપાસ અહેવાલમાં જાણવા મળ્યું છે કે સીરપમાં ડાયેથિલિન ગ્લાયકોલ (DG) અને ઇથિલિન ગ્લાયકોલ (EG) નું વધુ પડતું પ્રમાણ હતું, જે જીવલેણ બની શકે છે. WHO એ સંકેત આપ્યો છે કે ભારત તરફથી પ્રતિભાવ મળ્યા પછી તે વૈશ્વિક તબીબી ઉત્પાદન ચેતવણી જાહર કરી શકે છે.
ભારતના ડ્રગ કંટ્રોલરે તમામ રાજ્યો અને કેન્દ્રશાસિત પ્રદેશોને કડક સૂચનાઓ જાહેર કરી છે કે કોઈપણ દવા બજારમાં રજૂ કરતા પહેલા તેનું સંપૂર્ણ નિરીક્ષણ કરવામાં આવે. એજન્સીએ નિરીક્ષણ ખામીઓ પર ચિંતા વ્યક્ત કરી અને કંપનીઓને દરેક બેચને પૂરતા પરીક્ષણ પછી જ મુક્ત કરવાનો નિર્દેશ આપ્યો. મધ્યપ્રદેશના છિંદવાડામાં સૌથી વધુ કેસ નોંધાયા છે, અને મૃત્યુની વધતી સંખ્યાએ વહીવટીતંત્ર અને જનતા બંનેને ચિંતામાં મૂકી દીધા છે. આ કૌભાંડ માત્ર રાજ્ય માટે જ નહીં પરંતુ સમગ્ર દેશ માટે ફાર્માસ્યુટિકલ ઉદ્યોગની દેખરેખ પ્રણાલી પર ગંભીર પ્રશ્નો ઉભા કરે છે.