22 June, 2026 02:27 PM IST | Delhi | Gujarati Mid-day Correspondent
કૉક્રૉચ જનતા પાર્ટીના સમર્થકોએ બીજા દિવસે પણ રોડ પર પોસ્ટર્સ પાથરીને જંતરમંતર પર પ્રદર્શન કર્યું હતું.
નૅશનલ એન્ટ્રન્સ કમ એલિજિબિલિટી ટેસ્ટ-અન્ડરગ્રૅજ્યુએટ (NEET-UG) પેપર-લીક મામલે શરૂ થયેલું આંદોલન સતત બીજા દિવસે પણ યથાવત્ રહ્યું હતું. કૉક્રૉચ જનતા પાર્ટી (CJP)ના સ્થાપક અભિજિત દીપકેએ પરીક્ષા શરૂ થતાં પહેલાં વિદ્યાર્થીઓને શુભકામના આપવાની સાથે-સાથે એક વિડિયો શૅર કર્યો હતો. જેમાં તે જંતરમંતર પર ક્રિકેટ રમતો હતો. એ વિડિયો સાથે CJPના સોશ્યલ મીડિયામાં લખ્યું હતું, ‘કૉક્રૉચીઝ સુબહ હો ગઈ હૈ, આ જાઓ જંતરમંતર. જેન-ઝી પ્રોટેસ્ટ હૈ યે, થોડા ક્રિકેટ હોગા થોડા આંદોલન. ’
CJPએ ખેડૂતો પાસે પણ સમર્થન માગ્યું હતું અને પ્રદર્શનમાં તંત્ર દ્વારા થતી પરેશાની મામલે પણ સવાલો ઉઠાવ્યા હતા. સ્થાનિક તંત્ર ઉપરાંત વડા પ્રધાન નરેન્દ્ર મોદી સામે પણ મોરચો ખોલ્યો હતો. આ સાથે જ દિલ્હીના જંતરમંતર ખાતે ચાલી રહેલું વિરોધ-પ્રદર્શન વધુ ઉગ્ર બન્યું છે.
આંદોલનનો બીજો દિવસ : CJPના નેતૃત્વમાં શનિવારે શરૂ થયેલું આ અનિશ્ચિત મુદતનું આંદોલન ગઈ કાલે બીજા દિવસે પણ ચાલુ રહ્યું હતું, જેમાં ૪૦૦થી વધુ વિદ્યાર્થીઓ અને પ્રદર્શનકારીઓ જંતરમંતર પર યથાવત્ છે. આ ઉપરાંત અભિજિત દીપકેએ સમગ્ર દેશના ખેડૂતો પાસે પણ સમર્થન માગ્યું છે. તેમણે ખેડૂતોને મોટા પ્રમાણમાં જંતરમંતર ખાતે આવવા માટે આહવાન કર્યું છે.
રાજીનામાની મક્કમ માગણી : CJPના સ્થાપક અભિજિત દીપકેએ જાહેરાત કરી છે કે જ્યાં સુધી કેન્દ્રીય શિક્ષણપ્રધાન ધર્મેન્દ્ર પ્રધાન રાજીનામું નહીં આપે ત્યાં સુધી તેઓ આ સ્થળ છોડશે નહીં અને આખી રાત પ્રદર્શન ચાલુ રાખશે. જો વડા પ્રધાન નરેન્દ્ર મોદી ધર્મેન્દ્ર પ્રધાનને શિક્ષણપ્રધાનપદેથી નહીં હટાવે તો તે ઇતિહાસના સૌથી અસમર્થ વડા પ્રધાન સાબિત થશે.
થાળી-ચમચી અને મીમ્સ પ્રોટેસ્ટ : આ યુવા આંદોલનમાં વિદ્યાર્થીઓ કોવિડ સમયની યાદ અપાવતા હાથમાં થાળી અને ચમચી વગાડીને અનોખો વિરોધ કરી રહ્યા છે. આ ઉપરાંત ‘ગોપી વહુ’ અને ‘#Melodi’ જેવાં પૉપ કલ્ચર મીમ્સ ધરાવતાં પોસ્ટર્સ આકર્ષણનું કેન્દ્ર બન્યાં છે.
સોનમ વાંગચુકનું સમર્થન : જાણીતા પર્યાવરણવાદી સોનમ વાંગચુકે પણ પ્રદર્શનમાં જોડાઈને ચેતવણી આપી છે કે જો સરકારે શિક્ષણપ્રધાન સામે પગલાં ન લીધાં તો તેઓ ૨૭ જૂનથી ભૂખહડતાળ પર ઊતરશે.
પ્રશાસન સામે આક્ષેપ : પ્રદર્શનકારીઓએ આક્ષેપ કર્યો છે કે તેમને નબળા પાડવા માટે વહીવટી તંત્રે વિરોધ સ્થળનાં જાહેર શૌચાલયોમાં લગભગ ૪ કલાક સુધી પાણીનો પુરવઠો બંધ કરી દીધો હતો અને રાત્રે ભોજન લાવવામાં પણ અડચણો ઊભી કરી હતી.
જંતરમંતર પર કૉક્રૉચ ક્રિકેટ : અભિજિત દીપકે પ્રદર્શનકારીઓ સાથે ક્રિકેટ રમતા જોવા મળ્યા હતા. CJP દ્વારા સોશ્યલ મીડિયા પ્લૅટફૉર્મ X પર શૅર કરાયેલા વિડિયોમાં તેઓ આંદોલન વચ્ચે નાનો બ્રેક લઈને ક્રિકેટની મજા માણતા દેખાયા હતા. આ અનોખા પ્રયાસનો મુખ્ય હેતુ જેન-ઝી અને યુવાનોને આંદોલન તરફ આકર્ષિત કરવાનો છે.
