આવા યોગવીર હોય તો મેડલોનો ઢગલો જ થાયને

બીજી એશિયન યોગાસન સ્પોર્ટ્‍સ ચૅમ્પિયનશિપમાં ભારતીયો જીત્યા ૮૩ ગોલ્ડ, ૩ સિલ્વર અને ૧ બ્રૉન્ઝ મેડલ

યોગવીરો

વિશ્વભરને યોગ જેવા પૌરાણિક વિજ્ઞાનની દેન આપનાર ભારત યોગવીરોનો અખૂટ ભંડાર ધરાવે છે એ વાત તાજેતરમાં યોજાયેલી એશિયન યોગાસન સ્પોર્ટ્સ ચૅમ્પિયનશિપમાં સાબિત થઈ ગઈ છે. આ ચૅમ્પિયનશિપની બીજી સીઝન હતી. દિલ્હીના ઇન્દિરા ગાંધી સ્પોર્ટ્‌‌સ કૉમ્પ્લેક્સમાં યોજાયેલી આ ચૅમ્પિયનશપિમાં ૨૧ દેશોએ ભાગ લીધો હતો. ભારતે એમાં ૮૩ ગોલ્ડ મેડલ, ૩ સિલ્વર મેડલ અને ૧ બ્રૉન્ઝ મેડલ સાથે સૌથી વધુ મેડલ્સ મેળવ્યા હતા. ૩ ગોલ્ડ, ૩ સિલ્વર અને ૪ બ્રૉન્ઝ સાથે જપાન બીજા નંબરે રહ્યું હતું. ત્રીજા નંબરે મૉન્ગોલિયાએ ૧ ગોલ્ડ, ૧૧ સિલ્વર અને ૬ બ્રૉન્ઝ મેડલ મેળવ્યા હતા; જ્યારે ૧ ગોલ્ડ, ૩ સિલ્વર અને ૭ બ્રૉન્ઝ સાથે ઓમાન ચોથા નંબરે તેમ જ  ૨૭ સિલ્વર અને ૧૨ બ્રૉન્ઝ સાથે નેપાલ પાંચમા ક્રમે રહ્યું હતું. શારીરિક ફ્લેક્સિબિલિટી, પોઝ અને ટેક્નિક્સની બાબતમાં ભારતના આર્ટિસ્ટિક યોગવીરોના કૌશલ્યથી વિશ્વભરના યોગનિષ્ણાતો અચંબિત થઈ ગયા છે.