02 July, 2026 08:03 AM IST | Ayodhya | Gujarati Mid-day Correspondent
અવિનાશ શુક્લ જ્યાં રહેતો હતો એ યોગકેન્દ્રમાંથી દાનની રકમની એક પેટી પણ મળી આવી છે.
રામ મંદિરમાં દાનનાં નાણાંની ચોરીના મામલે અયોધ્યા પોલીસની તપાસ અત્યંત ઝડપથી આગળ વધી રહી છે અને તમામ ૮ આરોપીઓ હાલ જેલના સળિયા પાછળ છે. આ કેસનો એક મુખ્ય આરોપી અવિનાશ શુક્લ કૌશલપુરી વિસ્તારમાં આવેલા એક પ્રતિષ્ઠિત યોગકેન્દ્રમાં પોતાના ભાઈ અભિષેક સાથે રહેતો હતો. ચોરીનો આખો મામલો પ્રકાશમાં આવ્યાના ગણતરીના ૧૨ કલાકની અંદર જ ત્યાં નિયમિત આવતા યોગસાધકોએ બન્ને ભાઈઓને કેન્દ્રમાંથી હાંકી કાઢ્યા હતા જે દર્શાવે છે કે આ પવિત્ર સ્થળે થયેલી ચોરીને લઈને સમાજમાં કેટલો પ્રચંડ આક્રોશ વ્યાપ્યો છે.
મૂળ પ્રતાપગઢના વતની અને વ્યવસાયે શિક્ષક એવો અભિષેક જ પોતાના ભાઈ અવિનાશને આ વર્ષો જૂના યોગકેન્દ્રમાં લાવ્યો હતો. ગત પાંચ જૂનના રોજ જ્યારે આ ચોરીની પ્રથમ કડી મળી ત્યારે એ જ રાત્રે શ્રી રામજન્મભૂમિ તીર્થ ક્ષેત્ર ટ્રસ્ટના ઇશારે પોલીસે આ યોગકેન્દ્ર પર દરોડો પાડ્યો હતો. આ દરોડા દરમ્યાન પોલીસને ત્યાંથી એક આખો થેલો ભરીને ચોરીની રોકડ રકમ મળી આવી હતી જેની ગણતરી કરતાં એ ૮૯ લાખ રૂપિયા હતા. પોલીસની આ રાત્રે પાડેલી રેઇડનાં દૃશ્યો આસપાસનાં ઘરોમાં લાગેલા CCTV કૅમેરામાં પણ કેદ થયાં હતાં.
બીજી સવારે જ્યારે યોગસાધકોને આ બાબતની ખબર પડી ત્યારે તેમણે તરત જ ત્યાં રહેતા અભિષેક પાસે બ્લૉક ખાલી કરાવીને એને તાળું મારી દીધું હતું. અવિનાશ જેલમાં ગયા બાદ પોલીસ બે દિવસ પહેલાં તેના ભાઈ અભિષેકને પણ વધુ તપાસ અને પૂછપરછ માટે આ યોગકેન્દ્ર પર લાવી હતી. મુખ્ય આરોપી અવિનાશની આ શરમજનક કરતૂતથી સ્થાનિક કૉલોનીના રહીશો પણ સ્તબ્ધ અને અવાક થઈ ગયા હતા.
