GST બિલને કૅબિનેટે લીલી ઝંડી આપી દીધી

GST બિલને કૅબિનેટે લીલી ઝંડી આપી દીધી

લાંબા ગાળાથી એક યા બીજા કારણસર અટવાતું રહેલું GST (ગુડ્ઝ ઍન્ડ સર્વિસિસ ટેક્સ) પરનું બંધારણીય સુધારાનું બિલ બુધવારે કૅબિનેટે મંજૂર કરી દીધું હતું.  આ ક્રાન્તિકારી કરવેરા વિશેના બંધારણીય સુધારાને કૅબિનેટે મંજૂરીની મહોર મારતાં હવે આ સુધારો સંસદના સત્રમાં રજૂ થઈ શકશે. આ પગલું ભારતીય આર્થિક સુધારાની બહુ મોટી ઘટના ગણાય છે. આની દેશના અર્થતંત્ર તેમ જ વેપાર-ઉદ્યોગ પર લાંબા ગાળાની અને વ્યાપાક અસર થશે. મોદી સરકાર માટે આ સુધારો દાખલ થવાની ઘટના અને એનો અમલ બહુ મોટી સિદ્ધિ પણ ગણાશે.

બુધવારે મોડી સાંજે મંજૂર થયેલા આ બિલને હવે સંસદના ચાલુ શિયાળુ સત્રમાં રજૂ કરી શકાશે એમ જણાવાય છે. આ સત્ર ૨૩ ડિસેમ્બર સુધી ચાલવાનું છે. સરકાર GSTનો અમલ ૧ એપ્રિલ, ૨૦૧૬થી કરવા ધારે છે. GSTમાં સેન્ટ્રલ એક્સાઇઝ, સર્વિસ ટૅક્સ, વૅટ (વૅલ્યુ ઍડેડ ટૅક્સ) અને લોકલ વેરા સમાઈ જશે.