22 April, 2026 07:11 AM IST | Rajasthan | Gujarati Mid-day Correspondent
ચિત્તો
વાઇલ્ડલાઇફની દુનિયામાં એક અચરજભર્યા સમાચારે ખળભળાટ મચાવ્યો છે. વાત એમ છે કે મધ્ય પ્રદેશના કુનો નૅશનલ પાર્કથી નીકળીને KP-2 નામનો ચિત્તો રાજસ્થાનના રણથંભોર ટાઇગર રિઝર્વમાં પહોંચી ગયો છે. હાલમાં આ ચિત્તા સવાઈ માધોપુર જિલ્લામાં ઝોન-૯માં છે. વનવિભાગ પાસેથી મળેલી જાણકારી મુજબ ચિત્તો નીમલી ગામ પાસે છે. આ વિસ્તાર રણથંભોરના T-127 નામના વાઘનું સામ્રાજ્ય છે. ઑલરેડી અહીં બહારથી T-108 વાઘે પગપેસારો કર્યો છે અને આ વિસ્તારમાં દીપડા પણ ફરતા રહે છે. કૅટ ફૅમિલીના આ ત્રણેય ખૂંખાર પ્રાણીઓ એક જ વિસ્તારમાં હોવાથી વનવિભાગના અધિકારીઓ ટેન્શનમાં આવી ગયા છે. ક્યાંક ચિત્તાનો સામનો વાઘ અને દીપડા સાથે થઈ ગયો તો એ મુકાબલો ચિત્તા માટે ઘાતક બની શકે છે. વિશેષજ્ઞોનું કહેવું છે કે વાઘ અને દીપડા શારીરિક રીતે ચિત્તા કરતાં વધુ શક્તિશાળી હોય છે, પરંતુ ચિત્તા પાસે જે સ્ફૂર્તિ અને ગતિ હોય છે એને કારણે તે શિકારીથી આસાનીથી છટકી શકે છે.
રણથંભોરમાં પહેલી વાર ચિત્તાને કૅમેરામાં કેદ કરનારા વાઇલ્ડલાઇફ ફોટોગ્રાફર રવીન્દ્ર જૈને તસવીરો શૅર કરીને લખ્યું હતું, ‘વીસ એપ્રિલે ચિત્તો સવાઈ માધોપુર શહેરની અંદર સુધી આવી ગયો હતો. રણથંભોરમાં ચિત્તાને જોવો એ મારા માટે અદ્ભુત અને લાઇફટાઇમ અચીવમેન્ટ જેવું હતું. જોકે એને સ્પષ્ટપણ કૅપ્ચર કરવા માટે મારે અડધો કલાક ફીલ્ડિંગ ભરવી પડી હતી.’
