ગુજરાતમાં વેચવા કિડનૅપ કરવામાં આવ્યું પચીસ દિવસના નવજાત બાળકને

અંબરનાથની ચોંકાવનારી ઘટના, પોલીસે એક દિવસમાં પાંચ આરોપીઓને પકડીને બાળકને છોડાવ્યું

અંબરનાથ પોલીસે બાળકનું અપહરણ કરવા બદલ ધરપકડ કરેલા આરોપીઓ.

અંબરનાથ-વેસ્ટના સ્વામીનગર વિસ્તારમાંથી રવિવારે પચીસ દિવસના માસૂમ નવજાત શિશુને તેના પિતાના હાથમાંથી ઝૂંટવીને ભાગી જવાની ઘટનામાં અંબરનાથ પોલીસે એક મહિલા સહિત પાંચ આરોપીની ધરપકડ કરી છે. સ્વામીનગરમાં એક મૂક-બધિર મહિલાએ નશાની હાલતમાં રહેલા પિતા સાથે મારપીટ કરીને રવિવારે આ માસૂમ બાળકનું અપહરણ કર્યું હતું. ઘટનાની ગંભીરતાને ધ્યાનમાં રાખીને અંબરનાથ પોલીસે યુદ્ધના ધોરણે તપાસ શરૂ કરી હતી અને માત્ર એક જ દિવસની અંદર મુંબઈમાંથી બાળકની સુરક્ષિત મુક્તિ કરાવી હતી. આ પ્રકરણમાં કુલ પાંચ શંકાસ્પદોની ધરપકડ કરીને તેમને જેલના સળિયા પાછળ ધકેલી દેવામાં આવ્યા છે.

અંબરનાથ પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘સ્વામીનગર વિસ્તારમાં એક દંપતી તેમના પચીસ દિવસના નવજાત બાળક સાથે રહેતું હતું. રવિવારે સાંજના સમયે બાળકની માતા કોઈ કામકાજ અર્થે બહાર ગઈ હતી. ત્યારે એક મૂક-બધિર મહિલા ઘરમાં ઘૂસી આવી હતી. એ સમયે બાળકનો પિતા દારૂના નશામાં હોવાથી આરોપી મહિલાએ તેનો ગેરલાભ ઉઠાવીને પિતાને માર માર્યો હતો અને બાળકને આંચકીને ફરાર થઈ ગઈ હતી. બાળકના ગાયબ થવાની જાણ થતાં માતા-પિતાએ આખી રાત આસપાસના વિસ્તારોમાં શોધખોળ કરી હતી, પરંતુ પત્તો ન લાગતાં આખરે બીજા દિવસે અમારી પાસે ફરિયાદ નોંધાવી હતી. અમે તાત્કાલિક અપહરણનો ગુનો નોંધીને ટેક્નિકલ સર્વેલન્સ અને ગુપ્ત બાતમીદારોના આધારે મૂક-બધિર મહિલા પાર્વતી નાગરાજને ઝડપી લીધી હતી. તેની સઘન પૂછપરછમાં આ બાળક મુંબઈની એક મહિલાને સોંપાયું હોવાની વિગત બહાર આવી હતી. અમે ત્વરિત મુંબઈમાં દરોડો પાડીને બાળકની હેમખેમ મુક્તિ કરાવી હતી. પ્રાથમિક તપાસમાં આ નવજાત બાળકને ગુજરાતમાં વેચવા મોકલવાના મોટા કાવતરાની માહિતી સામે આવી છે.’