28 October, 2026 10:15 AM IST | Mumbai | Gujarati Mid-day Correspondent
ટાઇગર શ્રોફ
ટાઇગર શ્રોફ પર થયેલા ફાયરિંગના કેસમાં મુંબઈ પોલીસની ક્રાઇમ બ્રાન્ચે આરોપીઓ સામે મહારાષ્ટ્ર કન્ટ્રોલ ઑફ ઑર્ગેનાઇઝ્ડ ક્રાઇમ ઍક્ટ (MCOCA) દાખલ કર્યો છે. એક પોલીસ-અધિકારીના જણાવ્યા મુજબ ઑથોરિટી તરફથી ઔપચારિક મંજૂરી મેળવ્યા બાદ આ કાયદા હેઠળની કલમો કેસમાં ઉમેરવામાં આવી છે.
૧૮ ઑક્ટોબરે સાંજે જુહુ વિસ્તારમાં ટાઇગર શ્રોફની કાર પર થયેલા ગોળીબારની ઘટનાના બીજા દિવસે એટલે કે ૧૯ ઑક્ટોબરે જુહુ પોલીસ-સ્ટેશનમાં મૂળ ફર્સ્ટ ઇન્ફર્મેશન રિપોર્ટ (FIR) નોંધવામાં આવ્યો હતો. ત્યારે આ ફરિયાદ ભારતીય ન્યાય સંહિતા (BNS)ની કલમ ૧૦૯(૧) (હત્યાનો પ્રયાસ), કલમ ૩(૫) (સમાન ઇરાદો) તેમ જ આર્મ્સ ઍક્ટની સંબંધિત કલમો હેઠળ દાખલ કરવામાં આવી હતી.
ઔપચારિક મંજૂરી મળ્યા બાદ તમામ આરોપીઓ સામે MCOCAની કલમ ૩(૧)(ii), ૩(૨) અને ૩(૪)નો ઉમેરો કરવામાં આવ્યો છે. આ કલમો સંગઠિત ગુનાહિત પ્રવૃત્તિઓ આચરવા બદલ કડક સજાની જોગવાઈ કરે છે. ક્રાઇમ બ્રાન્ચે આ કેસમાં અત્યાર સુધીમાં ૧૧ લોકોની ધરપકડ કરી લીધી છે. જેલમાં બંધ ગૅન્ગસ્ટર લૉરેન્સ બિશ્નોઈના સાગરીત અનિલ પંડિતને આ કેસમાં વૉન્ટેડ આરોપી તરીકે જાહેર કરવામાં આવ્યો છે.
