22 October, 2026 07:07 AM IST | Mumbai | Gujarati Mid-day Correspondent
લૉરેન્સ બિશ્નોઈના ટાર્ગેટ પર હતા સલમાન ખાન, આમિર ખાન, રણબીર કપૂર, અમિતાભ બચ્ચન અને અક્ષય કુમાર
લૉરેન્સ બિશ્નોઈની ગૅન્ગ દ્વારા ટાઇગર શ્રોફ પર હુમલો કરનારા આરોપીઓએ ટાઇગર શ્રોફને ટાર્ગેટ બનાવ્યો એ પહેલાં બૉલીવુડની બીજી સેલિબ્રિટીઓનાં ઘરની પણ રેકી કરી હોવાનું મુંબઈ ક્રાઇમ બ્રાન્ચને તપાસ દરમ્યાન જણાયું છે. પકડાયેલા આરોપીઓની પૂછપરછ કરતાં તેમણે ટાઇગર શ્રોફ ઉપરાંત સલમાન ખાન, આમિર ખાન, રણબીર કપૂર, અમિતાભ બચ્ચન અને અક્ષય કુમારનાં ઘરની રેકી કરી હોવાનું જણાવ્યું હતું, પરંતુ તેમના સુરક્ષા-બંદોબસ્તને કારણે તેમણે પ્લાન બદલ્યો હોવાનું ત્રણેય આરોપીઓએ કબૂલ્યું હતું. મોટા સ્ટારને ટાર્ગેટ કરીને બૉલીવુડને કબજે કરવા માટે સેલિબ્રિટીઓના મનમાં ખોફ બેસાડવાનો હોય એવું જણાય છે.
પોલીસ જે પિસ્ટલથી હુમલો કરાયો એ ક્યાં સગેવગે કરવામાં આવી એની તપાસ પણ કરી રહી છે. હુમલામાં એક દેશી પિસ્ટલ અને એક ફૉરેન મેડ પિસ્ટલનો ઉપયોગ કરવામાં આવ્યો હતો.
એક રિક્ષાવાળાએ જ આરોપીને ટાઇગર શ્રોફના ફુટબૉલ શેડ્યુલ વિશે જણાવ્યું હતું. રિક્ષાવાળાએ આરોપીને કહ્યું હતું કે જૅકી શ્રોફનો દીકરો ટાઇગર શ્રોફ દર રવિવારે જુહુના એક ગ્રાઉન્ડમાં ફુટબૉલ રમવા માટે આવે છે. આ માહિતી મળ્યા બાદ આરોપીઓએ ૧૧ ઑક્ટોબરે જમનાબાઈ નરસી ગ્રાઉન્ડની રેકી કરી હતી.
મળેલી માહિતી મુજબ આરોપીઓને એવી સેલિબ્રિટીઓને નિશાન બનાવવાનું કહેવામાં આવ્યું હતું જેમની સિક્યૉરિટી ઓછી હોય અને જેમના પર સહેલાઈથી હુમલો કરી શકાય. એક આરોપી રિક્ષામાં બેસીને વિવિધ સેલિબ્રિટીઓનાં ઘર જોઈ આવ્યો હોવાનું પણ પૂછપરછ દરમ્યાન જાણવા મળ્યું હતું. આરોપી સ્થાનિક રિક્ષાવાળાઓને સેલિબ્રિટીઓનાં ઘર દેખાડવાનું કહેતો. સેલિબ્રિટીઓનાં ઘરના ફોટો પાડવા માગતો હોવાનું કહીને તે રિક્ષાવાળાઓને સેલિબ્રિટીઓનાં ઘર દેખાડવાનું કહેતો હોવાનું ક્રાઇમ બ્રાન્ચના અધિકારીઓને આરોપીએ જણાવ્યું હતું.
