08 May, 2026 11:44 AM IST | Mumbai | Gujarati Mid-day Correspondent
ઐરોલી અને શિળફાટા પાસે કાટઈ નાકાને જોડતો રસ્તો.
મુંબઈ મેટ્રોપૉલિટન રીજન ડેવલપમેન્ટ ઑથોરિટી (MMRDA)એ ઐરોલી-કાટઈ નાકા કૉરિડોરના વિકાસમાં નોંધપાત્ર માઇલસ્ટોન હાંસલ કર્યો છે, જે મુંબઈ મેટ્રોપૉલિટન રીજન (MMR)માં રીજનલ કનેક્ટિવિટીનો એક મહત્ત્વપૂર્ણ ઇન્ફ્રાસ્ટ્રક્ચર પ્રોજેક્ટ છે. આખો કૉરિડોર બન્યા પછી થાણે-નવી મુંબઈનું અંતર ૪૦ મિનિટ ઘટશે તેમ જ મુલુંડ અને કાટઈ નાકા વચ્ચેનું અંતર લગભગ સાતથી ૮ કિલોમીટર ઓછું થશે.
હાઈ-સ્પીડ કૉરિડોર તરીકે ડિઝાઇન કરાયેલો આ પ્રોજેક્ટ ઐરોલી, મુંબ્રા અને કાટઈ નાકાને સરળતાથી જોડવા ઉપરાંત મુસાફરીનું અંતર નોંધપાત્ર રીતે ઘટાડશે, હાલના રોડ-નેટવર્ક પર ભીડ હળવી કરશે અને નવી મુંબઈ, થાણે, કલ્યાણ-ડોમ્બિવલી અને બદલાપુર વચ્ચે ઝડપી, વધુ સારી રીતે ટ્રાન્સપોર્ટેશન વાહનોની અવરજવર થઈ શકશે. આ કૉરિડોર ૩ વ્યૂહાત્મક તબક્કામાં અમલમાં મૂકવામાં આવી રહ્યો છે, જેમાં બીજો તબક્કો હવે પૂરો થયો છે. પહેલા તબક્કાનું કામ પૂરું થવાને આરે છે અને ત્રીજા તબક્કાનું કામ ચાલુ છે.
