થાણેમાં લોન અને કૉન્ટ્રૅક્ટ અપાવવાના બહાને ટેક્સટાઇલ કંપનીના ડિરેક્ટર સાથે ૨૦.૫૮ કરોડ રૂપિયાની છેતરપિંડી

થાણે જિલ્લામાં એક ટેક્સટાઇલ કંપનીના ડિરેક્ટર સાથે પાંચ લોકોએ કથિત રીતે ૨૦.૫૮ કરોડ રૂપિયાની છેતરપિંડી કરી છે.

પ્રતીકાત્મક તસવીર

થાણે જિલ્લામાં એક ટેક્સટાઇલ કંપનીના ડિરેક્ટર સાથે પાંચ લોકોએ કથિત રીતે ૨૦.૫૮ કરોડ રૂપિયાની છેતરપિંડી કરી છે. આ લોકોએ ફૅક્ટરીના એક્સ્પાન્શન માટે લોન અને સરકારી સ્કૂલોમાં યુનિફૉર્મ પૂરો પાડવાનો કૉન્ટ્રૅક્ટ અપાવવાનું વચન આપ્યું હતું એમ પોલીસે શનિવારે જણાવ્યું હતું.
કોનગાવ પોલીસે ચુર ટેક્સટાઇલ્સ લિમિટેડના ડિરેક્ટર તુષાર ગોસરાણીની ફરિયાદના આધારે છેતરપિંડી અને ગુનાહિત કાવતરાનો કેસ નોંધ્યો છે. આ કથિત છેતરપિંડી ૨૦૨૦ અને ડિસેમ્બર ૨૦૨૫ની વચ્ચે થઈ હતી. ફરિયાદીએ આક્ષેપ કર્યો છે કે આરોપીઓએ ફૅક્ટરીના એક્સ્પાન્શન માટે લોન અને રાજ્ય સરકારની સ્કૂલોમાં ગણવેશ પૂરા પાડવાનો કૉન્ટ્રૅક્ટ અપાવવાનું વચન આપ્યું હતું.
અધિકારીએ જણાવ્યું હતું કે આરોપીઓએ તુષાર ગોસરાણી દ્વારા આપવામાં આવેલા સહી કરેલા કોરા ચેક, લેટરહેડ અને સુરક્ષા-દસ્તાવેજોનો દુરુપયોગ કર્યો હતો. તેમણે આપેલાં વચનો પૂરાં કર્યા વિના ૨.૯૫ કરોડ રૂપિયા રોકડમાં અને ૧૭.૬૩ કરોડ રૂપિયા બૅન્ક-ટ્રાન્સફર દ્વારા હડપ કરી લીધા હતા. આ કેસમાં હજી સુધી કોઈની ધરપકડ કરવામાં આવી નથી અને વધુ તપાસ ચાલુ છે એમ કોનગાવ પોલીસે જણાવ્યું હતું.