ડ્રાઇવર ઊંઘી ગયો એટલે ટૅન્કર પલટી ખાઈ ગયું
૨૦,૦૦૦ લિટર ઑઇલ લઈને મુંબઈથી ગુજરાત તરફ જઈ રહેલા આ ટૅન્કરનો ડ્રાઇવર સ્ટિયરિંગ વ્હીલ પર જ ઊંઘી ગયો હોવાથી અકસ્માત સર્જાયો હોવાનું પોલીસ તપાસમાં બહાર આવ્યું હતું. વહેલી સવારે ૩.૩૦ વાગ્યે આ ટૅન્કર ઈસ્ટર્ન એક્સપ્રેસ હાઇવે પર મુલુંડ પાસે પહોંચ્યું હતું. એ જ વખતે ડ્રાઇવરને ઝોકું આવ્યું એટલે ટૅન્કર ડિવાઇડર સાથે અથડાયું. ત્યારે જ જાગી ગયેલા ડ્રાઇવરે ટૅન્કર પર નિયંત્રણ મેળવવાનો પ્રયત્ન કર્યો પણ એ પહેલાં તો ટૅન્કર પલટી ખાઈ ગયું હતું.
આ અકસ્માતમાં કોઈને ઈજા થઈ નહોતી, પરંતુ રસ્તા પર ઢોળાયેલા તેલને સાફ કરવા માટે ફાયરબ્રિગેડની મદદ લેવામાં આવી હતી. ટૅન્કરને કારણે ટ્રાફિક જૅમ ન સર્જાય એ માટે ક્રેનને બોલાવીને ટૅન્કરને સાઇડ પર હટાવવામાં આવ્યું હતું. બાદમાં ટૅન્કરમાં રહેલું ઑઇલ અન્ય ડ્રમમાં ખાલી કરી નાખવામાં આવ્યું હતું.
તસવીરો : દત્તા કુંભાર