20 September, 2020 10:45 AM IST | Mumbai | Mumbai Correspondent
વિમળાબહેન શાહ
કોરોના વાઇરસથી ડર્યા વગર અને હિંમતભેર એની સામે લડીને છ દિવસમાં પાછા ઘરે ફરનાર ૯૦ વર્ષનાં વિમળાબહેન શાહને જ્યારે ખબર પડી કે તેઓ કોરોના પૉઝિટિવ છે ત્યારે જરાપણ ડર્યા નહોતાં અને પરિવારજનોને હિમંત આપતાં કહ્યું હતું કે હું મારી લડાઈ લડી લઈશ અને હૉસ્પિટલમાં એડ્મિટ થયાં હતાં અને કોરોનાની ટ્રીટમેન્ટ લઈ સ્વસ્થ થઈ ગઈ કાલે બપોરે દાદીમા ઘરે પાછા ફર્યાં હતાં.
સવારે અને સાંજે હું અડધો કલાક ઘરમાં જ વોકિંગ કરું છું, મારું કામ હું જાતે કરું છું એમ કહેતાં વિમળાબહેન શાહે ‘મિડ-ડે’ને કહ્યું હતું કે ઉંમરને હિસાબે શરીરમાં થોડી બહુ તકલીફ રહેતી હોય છે. દરરોજ હું ગિલોયની ગોળીઓ અને હળદરવાળું દૂધ પીવું છે જેનાં કારણે રોગપ્રતિકારક શક્તિ વધે છે, મારે લોકોને એ જ સંદેશ આપવો છે કે જો રિપોર્ટમાં કોરોના પૉઝિટિવ આવે તો જરાપણ ડરવું નહીં.