11 September, 2026 07:43 PM IST | Nagpur | Gujarati Mid-day Online Correspondent
વાયરલ વીડિયોમાંથી સ્ક્રીનશૉટ
મહારાષ્ટ્રના નાગપુરના સક્કરદારા વિસ્તારમાં આવેલી સ્ટેટ બૅન્ક ઓફ ઇન્ડિયા (SBI) ની બ્રાન્ચમાં લૂંટની ઘટના બની છે. આરોપી ગ્રાહક બનીને બૅન્કમાં પ્રવેશ્યો હતો. તે સીધો કૅશ કાઉન્ટર પર ગયો અને અચાનક કર્મચારીઓની આંખોમાં મરચાંનો પાવડર નાખ્યો. પોલીસના જણાવ્યા અનુસાર, આરોપી પોતાની સાથે મરચાંનો પાવડર લાવ્યો હતો. કર્મચારીઓની આંખોમાં મરચાંનો પાવડર પડતાં જ બૅન્કમાં અફરાતફરી મચી ગઈ હતી. આ તકનો લાભ ઉઠાવીને આરોપીએ કાઉન્ટર પરથી રૂ. ૪.૫૩ લાખ રોકડા ઉપાડી લીધા અને બૅન્કમાંથી ભાગી ગયો.
લૂંટની આ સમગ્ર ઘટના બૅન્કના CCTV કૅમેરામાં રેકોર્ડ થઈ ગઈ હતી. ફૂટેજમાં આરોપી કર્મચારીઓ પર મરચાંનો પાવડર ફેંકતો અને ત્યારબાદ રોકડ રકમ લઈને ભાગતો જોવા મળે છે. આ ફૂટેજના આધારે પોલીસે આરોપીની શોધખોળ શરૂ કરી હતી. ઘટનાની માહિતી મળતાં જ પોલીસે વિસ્તારમાં નાકાબંધી કરી હતી. તેમણે લગભગ ૩૦ મિનિટની અંદર જ આરોપીને ઝડપી લીધો અને તેની પાસેથી ચોરાયેલી તમામ રકમ કબજે કરી.
પોલીસે આરોપીની ઓળખ ૨૮ વર્ષીય સૂરજ ભોજરાજ બોરકર તરીકે કરી છે. તે ગ્રામીણ નાગપુરનો રહેવાસી છે અને બેરોજગાર હોવાનું જાણવા મળ્યું છે. સક્કરદારા પોલીસ સ્ટેશનના પોલીસ ઈન્સ્પેક્ટરના જણાવ્યા અનુસાર, હાલ આરોપીની પૂછપરછ કરવામાં આવી રહી છે. પોલીસ લૂંટ પાછળનો ઈરાદો જાણવાનો પ્રયાસ કરી રહી છે. પોલીસ એ પણ તપાસ કરી રહી છે કે સૂરજ ભોજરાજ બોરકરે એકલાએ લૂંટ કરી હતી કે તેનો કોઈ સાથીદાર હતો. આ ઉપરાંત, તેઓ તેના સાથીદારો અને ગુના પાછળની સંપૂર્ણ યોજના અંગે માહિતી એકત્ર કરી રહ્યા છે. લૂંટની આ ઘટના થોડી જ મિનિટોમાં બની ગઈ હતી. આરોપીએ પહેલા બૅન્ક કર્મચારીઓ પર મરચાંનો પાવડર ફેંક્યો અને પછી રોકડ લઈને ભાગી ગયો. CCTV ફૂટેજ અને પોલીસની ત્વરિત કાર્યવાહીને કારણે તેને લગભગ અડધા કલાકમાં જ પકડી લેવામાં આવ્યો હતો.
ખાતામાં મિનિમમ ઍવરેજ બૅલૅન્સ (MAB) ન જાળવવા બદલ બૅન્કોએ ગ્રાહકો પાસેથી જંગી દંડ વસૂલ કર્યો છે. રાજ્યસભામાં નાણારાજ્યપ્રધાન પંકજ ચૌધરીએ આપેલા સત્તાવાર આંકડા અનુસાર નાણાકીય વર્ષ ૨૦૨૫-’૨૬ દરમ્યાન બૅન્કોએ ગ્રાહકો પાસેથી પેનલ્ટી તરીકે ૭૦૮૬.૬૩ કરોડ રૂપિયા વસૂલ કર્યા છે. છેલ્લાં ૪ નાણાકીય વર્ષોમાં બૅન્કોએ આ રીતે કુલ ૨૬,૧૭૦.૩૭ કરોડ રૂપિયાની અધધધ રકમ એકઠી કરી છે. આંકડા દર્શાવે છે કે દંડ વસૂલ કરવામાં સરકારી બૅન્કોની સરખામણીએ ખાનગી બૅન્કો ઘણી આગળ છે. નાણાકીય વર્ષ ૨૦૨૫-’૨૬માં ખાનગી બૅન્કોએ કુલ ૪૯૪૮.૭૧ કરોડ રૂપિયા દંડપેટે વસૂલ્યા હતા, જેમાં ૧૭૯૮.૧૪ કરોડ રૂપિયા સાથે હાઉસિંગ ડેવલપમેન્ટ ફાઇનૅન્સ કૉર્પોરેશન (HDFC) બૅન્ક પ્રથમ અને ૧૦૮૧.૩૩ કરોડ રૂપિયા સાથે ઍક્સિસ બૅન્ક બીજા ક્રમે રહી હતી. બીજી તરફ દેશની તમામ ૧૨ સરકારી બૅન્કોએ મળીને કુલ ૨૧૩૭.૯૨ કરોડ રૂપિયા વસૂલ કર્યા હતા. એમાં સ્ટેટ બૅન્ક ઑફ ઇન્ડિયા (SBI)એ ૪૭૭.૨૭ કરોડ રૂપિયા અને બૅન્ક ઑફ બરોડાએ ૩૯૪.૧ કરોડ રૂપિયા એકઠા કર્યા હતા. રિઝર્વ બૅન્ક ઑફ ઇન્ડિયા (RBI)ના નિયમ મુજબ દંડ કાપતાં પહેલાં ગ્રાહકને શૉર્ટ મેસેજિંગ સર્વિસ (SMS) કે ઈ-મેઇલ દ્વારા જાણ કરવી ફરજિયાત છે. દેશની બારમાંથી ૧૦ સરકારી બૅન્કોએ બચત ખાતા પરનો આ દંડ સંપૂર્ણપણે નાબૂદ કર્યો છે.
