05 August, 2012 04:25 AM IST |
પ્લાનિંગના એક દાયકા કરતાં વધારે સમય બાદ આખરે પેડર રોડ ફ્લાયઓવરનો પ્રોજેક્ટ આગળ વધે એવી સંભાવના ઊભી થઈ છે, કારણ કે મહારાષ્ટ્ર સ્ટેટ રોડ ડેવલપમેન્ટ કૉર્પોરેશન (એમએસઆરડીસી) ટૂંક સમયમાં આ ફ્લાયઓવર બાંધવા માટે ટેન્ડર મગાવવાની છે. આ અઠવાડિયે ટ્રાફિક-પોલીસ અને એમએસઆરડીસી વચ્ચે યોજાયેલી મીટિંગમાં એમએસઆરડીસીએ ટ્રાફિક-પોલીસ ડિપાર્ટમેન્ટને વાહનચાલકો માટે ડાઇવર્ઝન રૂટ સૂચવવાની વિનંતી કરી હતી જેથી જ્યારે ફ્લાયઓવરનું કામ શરૂ થાય ત્યારે વાહનચાલકોને કોઈ મુશ્કેલી ન પડે.
હાલના તબક્કે જ્યારે ફ્લાયઓવરનું કામ હજી શરૂ નથી થયું ત્યારે સવારે અને સાંજે પીક-અવર્સ દરમ્યાન પેડર રોડ પર ટ્રાફિકની હાલત બહુ જ ખરાબ થઈ જાય છે અને સાંકડી ગલીઓને કારણે કલાકો સુધી ટ્રાફિક જૅમ થઈ જાય છે. હવે આ સાંકડી ગલીઓમાં ફ્લાયઓવર બાંધવાનું કામ શરૂ કરવાના એમએસઆરડીસીના આયોજનને કારણે ટ્રાફિકની પરિસ્થિતિ વધારે વણસે એવી સંભાવના છે. આ કારણે જ આ કામ શરૂ થાય એ પહેલાં ટ્રાફિક-પોલીસે વાહનચાલકો માટે વૈકિલ્પક રૂટ ઊભો કરવા માટે સારુંએવું રિસર્ચ કરવું પડે એમ છે.
આ મુદ્દે ‘મિડ-ડે’ સાથે વાત કરતાં એમએસઆરડીસીના ચીફ એન્જિનિયર એસ. નંદરગિરકરે કહ્યું હતું કે ‘અમે ટૂંક સમયમાં લાંબા સમયથી ચર્ચામાં રહેલા પેડર રોડ ફ્લાયઓવર માટે ટેન્ડર મગાવવાના છીએ. આ મુદ્દાની ચર્ચા કરવા માટે આ અઠવાડિયે એમએસઆરડીસીના અધિકારીઓ અને ટ્રાફિક-પોલીસ વચ્ચે મીટિંગ પણ થઈ છે. એક વખત વૈકલ્પિક રૂટ નક્કી થઈ જાય એ પછી અમે ટેન્ડર મગાવીશું.’
એમએસઆરડીસીના કેટલાક અધિકારીઓ માને છે કે આ પેડર રોડ ફ્લાયઓવરનું બાંધકામ ધારવામાં આવે છે એટલું સરળ નથી, કારણ કે કન્સ્ટ્રક્શનનું કામ પેડર રોડના અત્યંત ગીચ વિસ્તારમાં કરવાનું છે અને એક વાર આ રોડ કન્સ્ટ્રક્શન વખતે બંધ થઈ જશે એ પછી અહીં રહેતા લોકોની સમસ્યાઓ અનેકગણી વધી જશે.