જોજો ક્યાંક લપસી ન પડો

કાંજુરમાર્ગ અને ઘાટકોપર વચ્ચે ઇસ્ટર્ન એક્સપ્રેસ હાઇવે પર તેલ ઢોળાઈ જવાથી વાહનો લપસી ગયા

થોડી વાર માટે ટ્રાફિક જૅમની પરિસ્થિતિ જોવા મળી હતી

કાંજુરમાર્ગ અને ઘાટકોપર વચ્ચે ઈસ્ટર્ન એક્સપ્રેસવે પર ગઈ કાલે સાયન તરફ જતી લેનમાં એક વાહનમાંથી રોડ પર ઑઇલ ઢોળાયું હતું જેને કારણે એની પાછળથી આવી રહેલાં કેટલાંક ટૂ-વ્હીલર અને ફોર-વ્હીલર સ્કિડ થયાં હતાં. જોકે કોઈને ઈજા થઈ હોવાના અહેવાલ નથી. આ ઘટના બાદ કેટલાક વાહનચાલકોએ સ્થાનિક લોકોની મદદ લઈ ત્યાં સાઇડમાં પથ્થર ગોઠવીને એટલો ભાગ કૉર્ડન કરી લીધો હતો જેથી મોટરિસ્ટો ત્યાં ડ્રાઇવ ન કરે. ત્યાર બાદ ફાયર-બ્રિગેડ અને પોલીસને એ વિશે જાણ કરવામાં આવી હતી જેમણે આવીને એ ઑઇલ પર માટી નાખીને રસ્તો ફરી એક વાર ખુલ્લો કર્યો હતો. જોકે એ દરમ્યાન ત્યાં વાહનો ધીમેથી પસાર થતાં હોવાને કારણે થોડી વાર માટે ટ્રાફિક જૅમની પરિસ્થિતિ જોવા મળી હતી.