18 June, 2022 03:27 PM IST | Mumbai | Gujarati Mid-day Online Correspondent
પ્રતીકાત્મક તસવીર
રવિવારે મુંબઈના ઘણા ભાગોમાં ગાજવીજ સાથે વરસાદ પડવાની શક્યતા છે. ભારતીય હવામાન વિભાગે આ માટે યલો એલર્ટ જાહેર કર્યું છે. ગુરુવારે પણ મુંબઈના ઘણા ભાગોમાં હળવો વરસાદ પડ્યો હતો અને કુર્લા જેવા નીચાણવાળા વિસ્તારોમાં પાણી ભરાઈ ગયા હતા. હવામાન વિભાગે કહ્યું છે કે આગામી 36-48 કલાકમાં મુંબઈમાં હળવોથી મધ્યમ વરસાદ પડશે.
મુંબઈ, થાણે, પાલઘર માટે યલો એલર્ટ
IMD એ રવિવાર માટે મુંબઈ, થાણે, પાલઘર માટે યલો એલર્ટ જાહેર કર્યું છે અને કહ્યું છે કે અલગ-અલગ સ્થળોએ ભારે વરસાદની સંભાવના છે. અગાઉ ગુરુવારે સવારે 8.30 વાગ્યે સમાપ્ત થયેલા 24 કલાકમાં કોલાબા અને સાંતાક્રુઝ વેધશાળાઓમાં અનુક્રમે 18 મીમી અને 11.7 મીમી વરસાદ નોંધાયો હતો.
મુંબઈમાં આજે વાદળો છવાયેલા રહેશે
હવામાન વિભાગના જણાવ્યા અનુસાર, વરસાદના કારણે તાપમાનમાં ઘટાડો નોંધવામાં આવી રહ્યો છે. વિભાગના જણાવ્યા અનુસાર આજથી ભારે વરસાદ પડવાની શક્યતા છે અને 19 જૂન પછી પણ ભારે વરસાદની આગાહી કરવામાં આવી છે. વરસાદને કારણે પાણી ભરાવાની પણ શક્યતા છે.
મુંબઈમાં પ્રદૂષણની સ્થિતિ સુધરી
વરસાદને કારણે મુંબઈમાં હવાની ગુણવત્તામાં સુધારો થયો છે. સેન્ટ્રલ પોલ્યુશન કંટ્રોલ બોર્ડ (CPCB) અનુસાર, શુક્રવારે મુંબઈનો એર ક્વોલિટી ઈન્ડેક્સ (AQI) ‘સારી’ કેટેગરીમાં 34 પર નોંધવામાં આવ્યો હતો.