13 March, 2026 01:24 PM IST | Mumbai | Gujarati Mid-day Correspondent
પ્રતીકાત્મક તસવીર
સાકીનાકામાં એક સોસાયટીની લિફ્ટમાં એક પરિણીત યુવતીએ અજાણ્યા યુવાનને કરેલી કિસનો વિડિયો સોશ્યલ મીડિયા પર વાઇરલ થયા બાદ સાકીનાકા પોલીસે બુધવારે સોસાયટીના ચૅરમૅનના પચીસ વર્ષના પુત્ર સામે સાકીનાકા પોલીસ-સ્ટેશનમાં ફરિયાદ નોંધી છે. જાન્યુઆરીમાં યુવતી બિલ્ડિંગની લિફ્ટમાં જઈ રહી હતી ત્યારે એક અજાણ્યો પુરુષ લિફ્ટમાં પ્રવેશ્યો હતો. બન્નેએ એકબીજાને જોયા બાદ ભાવનાત્મક પળમાં એકબીજાને કિસ કરી હતી. આ ઘટના લિફ્ટમાં લાગેલા ક્લોઝ્ડ-સર્કિટ ટેલિવિઝન (CCTV) કૅમેરામાં સેવ થઈ હતી. આ વિડિયોને મોબાઇલ મારફત ફૉર્વર્ડ કરવાના આરોપમાં પોલીસે ચૅરમૅનના પુત્રની અટકાયત કરી હતી.
સાકીનાકા પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘જાન્યુઆરી મહિનાની શરૂઆતમાં યુવતી સવારે લગભગ ૧૦ વાગ્યે પોતાના બિલ્ડિંગની લિફ્ટમાં જઈ રહી હતી ત્યારે એક અજાણ્યો પુરુષ લિફ્ટમાં પ્રવેશ્યો હતો. બન્નેએ એકબીજાને જોયા બાદ ભાવનાત્મક પળમાં લિપ-કિસ કરી હતી. યુવતીના જણાવ્યા મુજબ આ ઘટના ત્યાં જ સમાપ્ત થઈ ગઈ હતી. જોકે ૯ માર્ચે સાંજે યુવતી માર્કેટમાં શાકભાજી લેવા ગઈ ત્યારે પાછળથી કોઈએ ‘આ વિડિયો બહુ વાઇરલ થઈ રહ્યો છે’ એવું કહેતાં તેણે પાછળ વળીને જોયું તો કેટલાક લોકો તેની તરફ જોઈને ચર્ચા કરતા હતા. શરૂઆતમાં યુવતીને વાત સમજાઈ નહોતી, પરંતુ પછી તેના વિસ્તારમાં રહેતી એક વ્યક્તિ પાસેથી તેને ખબર પડી કે લિફ્ટમાં બનેલી ઘટનાનો વિડિયો ઘણા લોકોના મોબાઇલમાં ફરતો થયો છે. સોસાયટીના ચૅરમૅન પાસે સમગ્ર બિલ્ડિંગના CCTV ફુટેજનું બૅકઅપ રહે છે, જ્યારે ટેક્નિકલ કામ તેમનો પુત્ર સંભાળે છે. યુવતીએ આરોપ મૂક્યો છે કે તેણે જ CCTV કૅમેરાના ફુટેજમાંથી આ વિડિયો મેળવીને મોબાઇલ મારફત વાઇરલ કર્યો છે જેથી સમાજમાં તેની બદનામી થાય. આ મામલે પોલીસે ચૅરમૅનના દીકરાની અટકાયત કરીને વધુ તપાસ શરૂ કરી છે.’
