30 July, 2020 07:20 AM IST | Mumbai | Ranjeet Jadhav
ઓક્સિમીટર
અંધેરીના એક ચિંતિત સ્થાનિકે ઑક્સિમીટર ખરીદ્યું ત્યારે તેમનો એકમાત્ર આશય તેમનું અને તેમના સ્વજનોનું ઑક્સિજન લેવલ તપાસવાનો હતો, પરંતુ જ્યારે તેમણે અખતરો કરવા ઑક્સિમીટરમાં પેન્સિલ મૂકી તો આ ડિવાઇસે પેન્સિલનું ઑક્સિજન-લેવલ અને હાર્ટ રેટ દર્શાવ્યાં! મહારાષ્ટ્ર નવનિર્માણ વિદ્યાર્થી સેનાના વાઇસ પ્રેસિડન્ટ કૌશલ ધુરી ચીનમાં બનેલા આ ડિવાઇસ સામે રોષે ભરાયા છે અને તેમણે જણાવ્યું હતું કે લોકોએ ચીનમાં બનેલાં ઑક્સિમીટર્સ ખરીદવાં ન જોઈએ.
‘મિડ-ડે’ સાથે વાત કરતાં ધુરીએ જણાવ્યું હતું કે ‘મેડિકલ ઉપકરણ વેચવાના ઓઠા હેઠળ ઘણો બિનભરોસાપાત્ર ચાઇનીઝ માલસામાન વેચવામાં આવે છે. આ ઉપકરણો લોકોના જીવન સાથે રમત કરી રહ્યાં છે, આથી એનો વિશ્વાસ કરી શકાય નહીં. હું લોકોને ચાઇનીઝ બનાવટનાં ઑક્સિમીટર્સ ન ખરીદવાની અપીલ કરું છું, કારણ કે મેં ખરીદેલું ડિવાઇસ પેન્સિલનું પણ ઑક્સિજન-લેવલ અને હાર્ટ-બીટ દર્શાવે છે. આવું ઑક્સિમીટર કોઈકનો જીવ જોખમમાં મૂકી શકે છે.’
ધુરીએ પંદરેક દિવસ અગાઉ ૧૮૦૦ રૂપિયામાં આ ઑક્સિમીટર ખરીદ્યું હતું. સામાન્યપણે પલ્સ ઑક્સિમીટર્સની કિંમત ૮૦૦થી ૪૦૦૦ રૂપિયા જેટલી હોય છે.
હવે ધુરી અન્ય લોકોને બનાવટી ઑક્સિમીટર વિશે જણાવવા માટે પેન્સિલનો ઉપયોગ કરી રહ્યા છે. તેમણે આ ડિવાઇસ પેન્સિલ પર ભરાવતાં કેવી રીતે એ નાડીના ધબકારા અને ઑક્સિજન- લેવલનું રીડિંગ કરે છે એનો વિડિયો પણ બનાવ્યો છે. આ વિડિયો સોશ્યલ નેટવર્કિંગ સાઇટ્સ પર લોકો સાથે શૅર કરવામાં આવી રહ્યો છે.