10 March, 2026 09:35 AM IST | Mumbai | Gujarati Mid-day Correspondent
મુંબઈ ઍરપોર્ટ
મુંબઈ ઍરપોર્ટના ટર્મિનલ T-2 પર ટૅક્સી કે રિક્ષાવાળા ભાડારૂપે વધારાના પૈસા પડાવતા હોવાની ફરિયાદ મળતાં સહાર પોલીસે કાર્યવાહી શરૂ કરી હતી. છેલ્લા બે મહિનામાં આ સંદર્ભે ૮૦ ફર્સ્ટ ઇન્ફર્મેશન રિપોર્ટ (FIR) નોંધાયા છે અને આરોપી રિક્ષા-ડ્રાઇવર અને ટૅક્સી-ડ્રાઇવર સામે ખંડણીનો ગુનો નોંધવામાં આવ્યો છે.
સહાર પોલીસે મહિલા સબ-ઇન્સ્પેક્ટર સ્મિતા પેડણેકરને ટૂરિસ્ટ બનાવીને ઍરપોર્ટ પરથી બહાર મોકલી હતી. તેણે કોલાબા જવા માટે ટૅક્સી કરી ત્યારે ડ્રાઇવરે કોલાબા જવાના ૧૭૦૦ રૂપિયા માગ્યા હતા અને એ પછી વધારાના ૩૫૦ રૂપિયા માગ્યા હતા. પોલીસે તેની ધરપકડ કરી છે.
અન્ય એક કિસ્સામાં ૧૨ જાન્યુઆરીએ અમેરિકાથી આવેલી એક મહિલા પ્રવાસી પાસેથી ૨૦૦ ડૉલર લઈને ટૅક્સી-ડ્રાઇવર નાસી ગયો હતો. પોલીસ-ફરિયાદ નોંધાતાં તેને ઝડપી લેવાયો હતો.
જાન્યુઆરીથી શરૂ થયેલી આ કાર્યવાહી અંતર્ગત માથાભારે ટૅક્સી અને રિક્ષા-ડ્રાઇવરો સામે કુલ ૮૦ FIR દાખલ કરવામાં આવ્યા છે, એમાંથી ૧૩ કેસ રિક્ષા-ડ્રાઇવર સામે નોંધાયા છે.
તેમનાં વાહનો જપ્ત કરવામાં આવ્યાં છે અને રીજનલ ટ્રાન્સપોર્ટ ઑફિસને કહીને તેમની પરમિટ અને ડ્રાઇવિંગ લાઇસન્સ કૅન્સલ કરવા જણાવાયું છે.
અત્યાર સુધી ૬ જણની ધરપકડ કરવામાં આવી છે.
પ્રવાસીઓ માટે પોલીસ ફૅસિલિટી સેન્ટર પાર્કિંગના છઠ્ઠા માળે બનાવવામાં આવ્યું છે જે જાન્યુઆરીથી શરૂ થયું છે.
