12 November, 2026 05:16 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
મુંબઈમાં બૉમ્બની વધુ એક ધમકી મળ્યા બાદ સુરક્ષા એજન્સીઓ હાઈ ઍલર્ટ પર છે. તાજેતરમાં મળેલા એક ઈમેલમાં મુંબઈના મેયરની ઑફિસ સહિત અનેક મહત્ત્વપૂર્ણ સ્થળોને ઉડાવી દેવાની ધમકી આપવામાં આવી છે. આ ઈમેલમાં એક બૅન્ક, કોર્ટ, અભિનેતા અમિતાભ બચ્ચનનો બંગલો, મહાલક્ષ્મી રેસકોર્સ અને છત્રપતિ શિવાજી મહારાજ આંતરરાષ્ટ્રીય ઍરપોર્ટનો પણ ઉલ્લેખ કરવામાં આવ્યો છે. ધમકીમાં મેયરની ઑફિસનો ઉલ્લેખ હોવાથી, બૃહન્મુંબઈ મ્યુનિસિપલ કૉર્પોરેશન (BMC) મુખ્યાલય ખાતે સુરક્ષા વ્યવસ્થા વધારી દેવામાં આવી છે. ઍલર્ટ મળ્યા બાદ સુરક્ષા ટીમોએ સમગ્ર ઑફિસ સંકુલમાં તપાસ કરી હતી. જોકે, ત્યાં કોઈ શંકાસ્પદ વસ્તુ મળી આવી ન હતી. ત્યારબાદ ઑફિસમાં કામગીરી સામાન્ય રીતે શરૂ કરી હતી.
છેલ્લા કેટલાક દિવસોમાં મેયરની ઑફિસને ઈમેલ દ્વારા આવી જ બૉમ્બની ધમકીઓ મળી છે. લગભગ બે અઠવાડિયા પહેલા પણ આવો જ એક ઈમેલ મળ્યો હતો. આ નવી ધમકીને પગલે સુરક્ષા એજન્સીઓ વધુ સતર્ક થઈ ગઈ છે. અહેવાલો અનુસાર, ગુરુવારે સવારે ૧૦:૧૨ વાગ્યે આ ઈમેલ મળ્યો હતો. આ ત્રીજી વખત છે જ્યારે આવી ધમકીભર્યો ઈમેલ મોકલવામાં આવ્યો છે. અગાઉના કિસ્સાઓથી વિપરીત, આ ઈમેલમાં અનેક મહત્ત્વપૂર્ણ સ્થળોને નિશાન બનાવવામાં આવ્યા છે.
ઈમેલ મળ્યા બાદ તરત જ મેયરની ઑફિસમાં સુરક્ષા વધારી દેવામાં આવી હતી. બૉમ્બ ડિટેક્શન એન્ડ ડિસ્પોઝલ સ્ક્વૉડ (BDDS) એ પરિસરમાં તપાસ કરી, પરંતુ ત્યાં કોઈ શંકાસ્પદ વસ્તુ કે વિસ્ફોટક સામગ્રી મળી આવી ન હતી. એવું પણ જાણવા મળ્યું છે કે ઈમેલમાં ‘ખાલિસ્તાન બોલેગા’ (Khalistan will speak) અને ‘મુંબઈ ઝિંદાબાદ’ જેવા શબ્દો પણ લખવામાં આવ્યા હતા. આ ધમકી બાદ સુરક્ષા એજન્સીઓ BMC મુખ્યાલય પર સતત નજર રાખી રહી છે.
વારંવાર ધમકીભર્યા ઈમેલ મળતા હોવાથી, ઈમેલ મોકલનારની ઓળખ કરવી મુંબઈ પોલીસ અને તપાસ એજન્સીઓ માટે એક મોટો પડકાર બની ગયો છે. પોલીસ હાલમાં ઈમેલ ક્યાંથી આવ્યો છે તે શોધવા અને આ ધમકીઓ પાછળ કોણ છે તે જાણવા માટે કામ કરી રહી છે. હાલમાં, તમામ સંબંધિત સ્થળોની સુરક્ષાને લઈને વિશેષ સતર્કતા રાખવામાં આવી રહી છે. તપાસ એજન્સીઓ ઈમેલના સ્ત્રોતને શોધવા અને જવાબદાર વ્યક્તિઓને ઓળખવા માટે પ્રયાસ કરી રહી છે.
