06 April, 2026 08:48 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
મહારાષ્ટ્ર એન્ટી-ટેરરિઝમ સ્ક્વોડ (ATS) અને દિલ્હી પોલીસ સ્પેશિયલ સેલ દ્વારા હાથ ધરવામાં આવેલા સંયુક્ત ઑપરેશનમાં 19 વર્ષીય યુવકની ધરપકડ બાદ, તેના પિતા, જલાલુદ્દીન સિદ્દીકીએ નિવેદન આપ્યું છે. તેમણે જણાવ્યું હતું કે તેમને આ ઑપરેશનની કોઈ પૂર્વ જાણકારી નહોતી.
મીડિયા સાથે વાત કરતા, જલાલુદ્દીન સિદ્દીકીએ જણાવ્યું કે 3 તારીખે સવારે લગભગ 4:00 થી 5:00 વાગ્યાની વચ્ચે કેટલાક વ્યક્તિઓ તેમના ઘરે પહોંચ્યા અને પોતાને એક એજન્સીના સભ્યો હોવાનું કહ્યું. તેમણે કહ્યું, "હું તે સમયે ઘરે નહોતો. જ્યારે હું પાછો ફર્યો, ત્યારે મને જાણ કરવામાં આવી કે તેઓ મારા પુત્રને દિલ્હી લઈ જઈ રહ્યા છે. મને કોઈ પૂર્વ સૂચના મળી ન હતી. પોલીસ સ્ટેશનમાં, મારી પાસેથી કેટલાક દસ્તાવેજો પર સહી કરાવવામાં આવી હતી." પોતાના પુત્રનો બચાવ કરતા, તેમણે ઉમેર્યું, "મારા પુત્રનું નામ મુહમ્મદ હમાદ સિદ્દીકી છે. તે ધોરણ 12નો વિદ્યાર્થી છે. તે વિદ્યાર્થી છે, ગુનેગાર નથી. તે અભ્યાસમાં સારો છે અને ઘરે આજ્ઞાકારી છે."
મુંબઈના કુર્લા વિસ્તારના રહેવાસી મુહમ્મદ હમાદ સિદ્દીકીની એક મોટી બહુ-રાજ્ય કાર્યવાહીના ભાગ રૂપે ધરપકડ કરવામાં આવી હતી. આ કાર્યવાહી મહારાષ્ટ્ર, મધ્યપ્રદેશ, ઓડિશા અને અન્ય પ્રદેશોમાં હાથ ધરવામાં આવી હતી. અધિકારીઓના જણાવ્યા અનુસાર, દિલ્હી અને અન્ય સ્થળોએ બૉમ્બ વિસ્ફોટોનું કાવતરું ઘડવાના આરોપસર ત્રણ વ્યક્તિઓની ધરપકડ કરવામાં આવી છે તેમ જ એક કાવતરું જે સમયસર નિષ્ફળ બનાવવામાં આવ્યું હતું.
અન્ય આરોપીઓની ઓળખ થાણે જિલ્લાના ખડાવલીનો રહેવાસી મોસૈબ અહેમદ (30) અને `બડા ઇમરાન` તરીકે કરવામાં આવી છે. બડા ઇમરાનની ઓડિશામાં ધરપકડ કરવામાં આવી હતી અને તેના પર ISIS સાથે સંકળાયેલા ઓનલાઈન નેટવર્ક સાથે જોડાણ હોવાનો આરોપ છે.
તપાસ એજન્સીઓના જણાવ્યા અનુસાર, સોશિયલ મીડિયા પર શૅર કરવામાં આવતા ઉગ્રવાદી કન્ટેન્ટ દ્વારા આરોપીઓને કટ્ટરપંથી બનાવવામાં આવ્યા હતા. ઑપરેશન દરમિયાન, એક રમકડાની ટ્રેન, વાયર, સર્કિટ અને અન્ય ઇલેક્ટ્રોનિક ઘટકો, જેનો ઉપયોગ ઇમ્પ્રુવાઇઝ્ડ એક્સપ્લોઝિવ ડિવાઇસ (IED) બનાવવા માટે થઈ શકે છે તે પણ જપ્ત કરવામાં આવ્યા હતા. પ્રાથમિક તપાસમાં એ પણ બહાર આવ્યું છે કે મુંબઈના આરોપીઓ ડિલિવરી મિકેનિઝમ તરીકે ટૉય ટ્રેનનો ઉપયોગ કરીને ઓછી તીવ્રતાવાળા વિસ્ફોટક ઉપકરણ બનાવવાનો પ્રયાસ કરી રહ્યા હતા. આ કામગીરી કથિત રીતે બડા ઇમરાનના નિર્દેશો હેઠળ કરવામાં આવી રહી હતી. એજન્સીઓએ વિસ્ફોટકો બનાવવાની પદ્ધતિઓ સંબંધિત ઓનલાઈન સ્ત્રોતોમાંથી મેળવેલી ડિજિટલ કન્ટેન્ટ પણ જપ્ત કર્યું છે.
એજન્સીઓ હવે આ નેટવર્કના અવકાશ અને અન્ય સંભવિત જોડાણોની તપાસ કરી રહી છે. અધિકારીઓ જણાવે છે કે આ મામલે વધુ તપાસ ચાલુ છે, અને અન્ય પાસાઓની પણ તપાસ કરવામાં આવી રહી છે.
