15 April, 2014 05:40 AM IST |
વેસ્ટર્ન એક્સપ્રેસ હાઇવે પર રોજ નીકળતા મુંબઈગરાઓની ટ્રાફિક બાબતની મુશ્કેલી મે મહિનામાં વધી જવાની છે. દિંડોશી ફ્લાયઓવરના નુકસાનગ્રસ્ત સાઉથબાઉન્ડ છેડાનું રિપેરિંગ પખવાડિયાની અંદર શરૂ થવાનું હોવાથી આ ફ્લાયઓવર સદંતર બંધ થવાની શક્યતા છે. આ ફ્લાયઓવરના સાઉથબાઉન્ડ છેડે નવ સ્લૅબમાં પડેલી મોટી તિરાડો નીચેથી સ્પષ્ટ દેખાય છે અને ઇન્ડિયન ઇન્સ્ટિટ્યૂટ ઑફ ટેક્નૉલૉજી-બૉમ્બેની ટીમે કરેલી ભલામણ પ્રમાણે એનું તત્કાળ રિપેરિંગ જરૂરી છે એવા સમાચારો સતત મળતા રહ્યા છે.
જોકે મહારાષ્ટ્ર સ્ટેટ રોડ ડેવલપમેન્ટ કૉર્પોરેશન (MSRDC) અને મુંબઈ ટ્રાફિક-પોલીસ દ્વારા લાંબા વિલંબ બાદ આખરે શુક્રવારે ટ્રાફિક-પોલીસ, MSRDC અને પબ્લિક વક્ર્સ ડિપાર્ટમેન્ટ (PWD)ની મીટિંગ બાદ આ ફ્લાયઓવર બ્રિજનું રિપેરિંગ કરવાનું નક્કી થયું હતું.
જોકે ટ્રાફિક-પોલીસનો આગ્રહ હતો કે રિપેરિંગ દરમ્યાન પણ બ્રિજની એક લેન ચાલુ રાખવામાં આવે જ્યારે MSRDC ઇચ્છે છે કે સમગ્ર સાઉથબાઉન્ડ છેડો બંધ રાખવામાં આવે. ‘મિડ-ડે’ સાથેની વાતચીતમાં MSRDCના સુપરિન્ટેન્ડેન્ટ એન્જિનિયર બી. એન. ઓહોલે કહ્યું હતું કે ‘અમે તો રિપેરિંગ દરમ્યાન દિંડોશી ફ્લાયઓવરની સાઉથબાઉન્ડ તમામ ત્રણ લેનો બંધ રાખવા પર ધ્યાન કેન્દ્રિત કર્યું હતું. જોકે ટ્રાફિક-ડિપાર્ટમેન્ટની મર્યાદાઓ હોવાથી આ રિપેરિંગ દરમ્યાન અમે એ વિશે વિચારીશું.’
MSRDCના એક સિનિયર અધિકારીએ કહ્યું હતું કે ‘ડૅમેજ થયેલા સ્લૅબનું રિપેરિંગ નાનું-મોટું કામ નથી.
આ માટે અમારે ત્રણે લેન બંધ રાખવી પડશે. જો ટ્રાફિક-ડિપાર્ટમેન્ટ આ માટે મંજૂરી નહીં આપે તો અમને કામ કરવામાં અડચણ આવશે.’
ટ્રાફિક-ડિપાર્ટમેન્ટે નાનાં વાહનો માટે એક લેન ખુલ્લી રાખવાનો આગ્રહ રાખ્યો છે. આ ઉપરાંત મોટાં વાહનોને ફ્લાયઓવર નીચેના સર્વિસ રોડ પર ડાઇવર્ટ કરવાની વિચારણા છે. જોકે આ સર્વિસ રોડ પણ PWD રિપેર કરવાનો છે. મીટિંગમાં એવું નક્કી થયું હતું કે પહેલાં PWD સર્વિસ રોડ રિપેર કરી લે ત્યાર બાદ જ આ ફ્લાયઓવરનું રિપેરિંગ શરૂ થશે અને PWD આ કામ એક અઠવાડિયામાં કરવા માટે સંમત થયો હતો.
PWDના એક્ઝિક્યુટિવ એન્જિનિયર બી. બી. લોહારે કહ્યું હતું કે ‘ટ્રાફિક-ડિપાર્ટમેન્ટનો આગ્રહ હતો કે રિપેરિંગ શરૂ થાય ત્યારે નાનાં વાહનો માટે ફ્લાયઓવરની એક લેન તો ખુલ્લી જ રાખવી, પરંતુ એ પહેલાં સાઉથબાઉન્ડ સર્વિસ રોડનું રિપેરિંગ અમે એક અઠવાડિયામાં કરી આપીએ જેથી ફ્લાયઓવરના રિપેરિંગ દરમ્યાન મોટાં વાહનોને આ સર્વિસ રોડ પર ડાઇવર્ટ કરી શકાય.’
હાલમાં આ ફ્લાયઓવરની નીચેનો સાઉથબાઉન્ડ સર્વિસ રોડ જનરલ એ. કે. વૈદ્ય માર્ગ જંક્શન સુધી ખરાબ હાલતમાં છે એના કારણે ટ્રાફિકની ગતિ ધીમી રહે છે અને પીક-અવર્સમાં ટ્રાફિક જૅમથી હાલાકી થાય છે.
હાલમાં આ ફ્લાયઓવર પર ભારે અને મોટાં વાહનો પર પ્રવેશબંધી હોવાનાં ર્બોડ મૂકેલાં હોવા છતાં શુક્રવારે ‘મિડ-ડે’ની ટીમે મુલાકાત લીધી ત્યારે ત્યાં કોઈ પણ રોકટોક વગર ફ્લાયઓવરના નુકસાનગ્રસ્ત સાઉથબાઉન્ડ રોડ પર આવાં વાહનો દોડતાં જોવા મળ્યાં હતાં એમને રોકવા માટે ત્યાં કોઈ જ નહોતું.
MSRDCએ આ નબળા પડી ગયેલા ફ્લાયઓવરના સાઉથબાઉન્ડ રોડ પર ભારે વાહનોને પસાર થવા દેવા સામે કડક ચેતવણી ઉચ્ચારેલી હોવા છતાં એનું કહેવું છે કે ટ્રાફિક-ડિપાર્ટમેન્ટે આ ચેતવણીને ગંભીરતાથી નથી લીધી. જોકે ૨૦૧૩ના ઑક્ટોબરમાં દિંડોશી ફ્લાયઓવરના સાઉથબાઉન્ડ સ્ટ્રેચનું રિપેરિંગ કરવામાં આવ્યું ત્યારે માત્ર એક લેન જ બંધ કરવામાં આવી હતી છતાં ત્યાં હદની બહાર ટ્રાફિક જૅમની સ્થિતિ સર્જાતી હતી.