બન્ને યંગસ્ટરો માટે આ તો રૂટીન સ્ટન્ટ હતો

લટકી પડેલી યુવતી અને તેને પકડી રાખનાર ગુજરાતી યુવાન પ્રોફેશનલ એથ્લીટ છે, તેમને નથી લાગતું કે તેમણે પોતાનો જીવ જોખમમાં મૂક્યો હતો

સ્ટન્ટ

પુણે-સાતારા હાઇવે પર થોડે જ દૂર આવેલા અવાવરું રિસૉર્ટની છત પરથી જીવ જોખમમાં મૂકતા સ્ટન્ટનો વિડિયો બનાવનાર ૨૪ વર્ષનો ​મિહિર ગાંધી અને ૨૧ વર્ષની મીનાક્ષી સાળુંખે ઍથ્લીટ્સ હોવાનું બહાર આવ્યું છે. જોકે તેમણે કરેલો સ્ટન્ટ જોખમી હોવાથી સોશ્યલ મીડિયાથી લઈને બધે તેમની ‌ટીકા કરવામાં આવી રહી છે. આ જ કારણસર વાઇરલ થયેલા આ વિડિયોની દખલ પુણે પોલીસે લઈને તેમની સામે ગુનો દાખલ કર્યો છે. ગઈ કાલે બન્નેને પોલીસે બોલાવ્યાં હતાં અને તેમની અરેસ્ટ પણ કરી હતી. જોકે તેમની સામે નોંધાયેલા ગુના અંતર્ગત છ મહિના સુધીની જ સજા હોવાથી તેમને કસ્ટડીમાં નહોતાં મોકલવામાં આવ્યાં.

અમે એ વિડિયો કોણે અપલોડ કર્યો હતો એની ટેક્નિકલ ડીટેલ્સ કઢાવીને તેમના સુધી પહોંચ્યા હતા અને તેમને પૂછપરછ માટે પોલીસ-સ્ટેશન આવવા કહ્યું હતું એમ જણાવીને ભારતી વિદ્યાપીઠ પોલીસ-સ્ટેશનના સિનિયર પોલીસ-ઇન્સ્પેક્ટર દશરથ પાટીલે ‘મિડ-ડે’ને કહ્યું હતું કે ‘તે બન્ને મંગળવારે રાતે પોલીસ-સ્ટેશને આવ્યાં હતાં. અમે તેમની પૂછપરછ કરતાં તેમણે કહ્યું કે તેઓ બન્ને ઍથ્લીટ્સ છે અને અલગ-અલગ પ્રકારના સ્ટન્ટ કરતાં રહે છે. મિહિર ગાંધીના ઇન્સ્ટાગ્રામ પર અનેક વિડિયો છે, જ્યારે મીનાક્ષી પણ ઇન્સ્ટા પર ઍક્ટિવ છે. અમે તેમને જાનના જોખમે વિડિયો ન બનાવવા સમજાવ્યાં હતાં. તેમને કહ્યું હતું કે આમ કરીને તમે તમારો અને અન્યનો જીવ જોખમમાં મૂકો છો.’

મિહિર અને મીનાક્ષી એકલાં જ પોલીસ-સ્ટેશને આવ્યાં હતાં એમ જણાવીને કેસના ઇન્વેસ્ટિગેશ‌ન ઑફિસરે ‘મિડ-ડે’ને કહ્યું હતું કે ‘અમે તેમનાં સ્ટેટમેન્ટ્સ નોંધ્યાં હતાં. જોકે આ સ્ટન્ટ કરીને તેમણે જીવ જોખમમાં મૂક્યો છે એવું તેમને નથી લાગતું. અમે તેમને નોટિસ મોકલી છે અને સોમવારે કોર્ટમાં હાજર રહેવા કહ્યું છે.’

વિદેશમાં લોકપ્રિયતાને વરેલી ‘પાર્કુર’ ગેમ, જેમાં અલગ-અલગ હર્ડલ્સ બહુ જ સિફતથી અને સ્પીડમાં પાસ કરવાનાં હોય છે એના મિહિર અને મીનાક્ષી પ્રોફેશનલ ખેલાડી છે એમ જણાવતાં તેમના કોચે ‘મિડ-ડે’ને કહ્યું હતું કે ‘બોથ આર પ્રોફેશનલ. આ તેમનું પૅશન છે. આ ગેમમાં ફ્લે​ક્સિ​બિ​લિટી અને સ્ટ્રેન્થ બન્નેનો સમન્વય હોય છે. આ વિડિયો બાબતે લોકોની જે પ્રતિક્રિયા આવી છે એ સમજી શકાય એમ છે. જોકે આ રીલ તેમણે પ્રોફેશનલ કારણસર બનાવી હતી, નહીં કે લાઇક્સ મેળવવા. આ તેમનું રૂટીન છે. વિડિયો જોઈને કોઈને પણ એવું થાય કે બહુ ઊંચા બિલ્ડિંગ પરથી આ કરવામાં આવ્યું છે, પણ ઍક્ચ્યુઅલમાં એવું નથી. મીનાક્ષી જ્યાં લટકી છે એ જગ્યાએથી પહેલો ડ્રૉપ માત્ર ૨૦ ફુટ નીચે છે અને આ પ્રકારના સ્ટન્ટ કરવા તેઓ વેલ-ટ્રેઇન્ડ છે. સૌથી મહત્ત્વની વાત એ છે કે આ ડ્રૉપથી નીચે પડાય એવું નથી. એ સાથે જ તેમણે એ પણ કાળજી લીધી હતી કે એે વિડિયો અપલોડ કરીને લખ્યું હતું કે આ સ્ટન્ટ પ્રોફેશનલ્સ દ્વારા કરવામાં આવ્યો હોવાથી કોઈએ જાતે એ કરવાની કોશિશ ન કરવી. જોકે લોકોએ તેમના એ પ્રયાસને ખોટી રીતે લીધો. ધે આર ક્વાઇટ કેપેબલ. આ ઘટનાને કારણે તેમની કરીઅરને અવળી અસર ન થવી જોઈએ. બન્ને તેમની આ એબિલિટીને કારણે કમાન્ડો બની શકે છે અને સૈન્યમાં પણ જોડાઈ શકે છે.’