25 December, 2020 10:18 AM IST | Mumbai | Gujarati Mid-day Correspondent
પ્રતીકાત્મક તસવીર
થાણેના ઘોડબંદર રોડ પર આવેલી જલસા લૉનમાં ૩૦ નવેમ્બરે ફરિયાદી અનીતા ઓમવીર સિંહના દીકરા સચિનનાં લગ્ન હતાં. એ વખતે અનીતા સિંહે ફોટો પડાવતી વખતે તેમના હાથમાંની દાગીનાની બૅગ એક જ મિનિટ માટે બાજુની ખુરસી પર મૂકી હતી. એ જ તકની લાગમાં રહેલા ચોરોએ દાગીનાની બૅગ ઉઠાવી ગયા હતા. ૪૨૩ ગ્રામ અંદાજે ૧૯,૦૩,૫૦૦ રૂપિયાની કિંમતના દાગીનાની બૅગ ચોરાઈ જતાં અનીતા સિંહે આ બાબતે કાસરવડવલી પોલીસ સ્ટેશનમાં ફરિયાદ કરી હતી.
કાસરવડવલી પોલીસે સીસીટીવી કૅમેરાનાં ફુટેજ અને અન્ય રીતે તપાસ કરીને આખરે એ રીઢા ચોર બબલુ સુમેરસિંહ સિસોદિયા અને તેના બે સાગરીતોએ ચોરી કરી હોવાનું શોધી કાઢ્યું હતું. કાસરવડવલી પોલીસ ત્યાર બાદ બબલુને તેના રાજગડ જિલ્લાના પચોર તાલુકાના ગુલખેડી ગામમાંથી પકડી લાવી હતી. એટલું જ નહીં, તેણે ચોરેલા બધા દાગીના હસ્તગત કર્યા હતા.