મલાડના ઇમિટેશન જ્વેલરીના વેપારીની આવી તે કેવી ગફલત?

૧૦ લાખ રૂપિયાની લોન લેવાના ચક્કરમાં ૩૨,૯૦,૧૨૮ રૂપિયા ગુમાવી દીધા

પ્રતીકાત્મક તસવીર

મલાડ-વેસ્ટના ભંડારવાડા વિસ્તારમાં રહેતા ઇમિટેશન જ્વેલરીના ૩૨ વર્ષના વેપારીએ ૧૦ લાખ રૂપિયાની લોન મેળવવાના ચક્કરમાં ૩૨,૯૦,૧૨૮ રૂપિયા સાઇબર છેતરપિંડીમાં ગુમાવ્યા હોવાની ફરિયાદ નૉર્થ રીજન સાઇબર પોલીસ-સ્ટેશનમાં ગઈ કાલે નોંધાઈ હતી. લોન આપતાં પહેલાં સાઇબર ગઠિયાઓએ TDS ચાર્જિસ, NOC ચાર્જિસ, લોન ઇન્શ્યૉરન્સ ચાર્જિસ, GST ચાર્જિસ એમ વિવિધ ચાર્જિસના નામે ૯ જૂનથી ૧૧ ઑગસ્ટ સુધી પૈસા લીધા હતા. સતત બે મહિના સુધી પૈસા ભર્યા બાદ પણ લોનની રકમ મળી નહોતી.  અંતે વધુ તપાસ કરવામાં આવતાં છેતરપિંડીનો ખુલાસો થયો હતો. વેપારીએ લોન મેળવવાના ચક્કરમાં ૧૭ લાખ રૂપિયા જુલાઈ સુધીમાં ભરી દીધા બાદ સાઇબર ગઠિયાએ પોતાનો એક નંબર બંધ કરી દીધો હતો. એ દરમ્યાન વેપારીએ બીજા નંબર પર સંપર્ક કરીને પોતાની ભરેલી રકમ સહિત લોન મેળવવા માટે બીજા પૈસા ભર્યા હોવાનો દાવો ફરિયાદમાં કર્યો છે.

૧૫ લાખ રૂપિયાની રિકવરી

નૉર્થ રીજન સાઇબર પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘ફરિયાદીએ તાત્કાલિક અમને ફરિયાદ કરી હોવાથી આશરે ૧૫ લાખ રૂપિયા જેટલી રકમ રિકવર કરવામાં અમને સફળતા મળી છે. આ મામલે બીજા પૈસા પાછા મેળવવા માટેનો પ્રયાસ અમે કરી રહ્યા છીએ.’

કેવી રીતે છેતરાયો વેપારી?

વેપારીએ ‘મિડ-ડે’ને કહ્યું હતું કે ‘ઇમિટેશન જ્વેલરીનો વ્યવસાય કરી મારું ગુજરાન ચલાવું છું. બૅન્કની તમામ એન્ટ્રી રાખવા માટે મેં પ્લેસ્ટોર પરથી ખાતા-બુક નામની ઍપ્લિકેશન ડાઉનલોડ કરી હતી જેના પર મને ૧૦ લાખ રૂપિયા લોન મળશે એવું દેખાડવામાં આવતાં મેં વ્યવસાય વધારવા માટેની યોજના બનાવી હતી અને લોન માટે ઍપ્લિકેશન કરી હતી. ૯ જૂને પ્રધાનમંત્રી મુદ્રા યોજના ઑફિસનો અધિકારી હોવાનો દાવો કરીને એક યુવકે મને ફોન કર્યો હતો અને તેણે મારી પાસેથી તમામ માહિતી લીધા બાદ મને લોન મેળવી આપશે એવું આશ્વાસન આપ્યું હતું. શરૂઆતમાં ૧૫૫૦ રૂપિયા લૉગિન-ચાર્જિસના નામે લીધા હતા. ત્યાર બાદ મારી લોન પાસ થઈ ગઈ છે એમ કહીને જુલાઈના અંત સુધીમાં આશરે ૧૭ લાખ રૂપિયા પડાવી લીધા હતા. ત્યાર બાદ મારી સાથે વાત કરનાર બન્ને વ્યક્તિઓના ફોન સ્વિચ્ડ-ઑફ આવતાં મને વૉટ્સઍપ પર મળેલા દસ્તાવેજમાં વધુ એક નંબર મળ્યો હતો જેના પર સંપર્ક કરતાં સામેવાળી વ્યક્તિએ પોતાની ઓળખ દયાશંકર મિશ્રા કહીને તેણે રિલાયન્સ ફાઇનૅન્સ ડિપાર્ટમેન્ટમાં રિકવરી ઑફિસર હોવાનો દાવો કર્યો હતો અને તેણે ૧૭ લાખ રૂપિયા તેમ જ ૧૦ લાખ રૂપિયાની લોન મેળવી આપશે એવો વાયદો કરીને મારી પાસેથી બીજા ૧૫,૯૦,૧૨૮ રૂપિયા લીધા હતા. એ પછી પણ વધુ પૈસાની માગણી કરતાં મને શંકા ગઈ હતી. એ પછી એ ઘટનાની જાણ મેં મારા ભાઈને કરી ત્યારે મારી સાથે બન્ને વ્યક્તિઓએ ૩૨,૯૦,૧૨૮ રૂપિયાની છેતરપિંડી કરી હોવાની જાણ થઈ હતી. અંતે મેં ઘટનાની ફરિયાદ નૉર્થ રીજન સાઇબર પોલીસ-સ્ટેશનમાં નોંધાવી હતી.’