ઈ-ચલાનની સમસ્યાના ઉકેલ માટે પૅનલની રચના પૅસેન્જર ટ્રાન્સપોર્ટ વાહનોની હડતાળ ટળી

પ્રતાપ સરનાઈકે જણાવ્યું હતું કે અયોગ્ય કે સખત દંડ ફટકાર્યા વગર ટ્રાન્સપોર્ટર્સને સપોર્ટ કરે એવી ટ્રાન્સપરન્ટ સિસ્ટમ ઊભી કરવાની જરૂર છે.

મહારાષ્ટ્રના ટ્રાન્સપોર્ટ મિનિસ્ટર પ્રતાપ સરનાઈક

રાજ્યના ટ્રાન્સપોર્ટર્સને ઈ-ચલાન સિસ્ટમને કારણે મુશ્કેલી થતી હતી. આ સમસ્યાના સમાધાન માટે મહારાષ્ટ્રના ટ્રાન્સપોર્ટ મિનિસ્ટર પ્રતાપ સરનાઈકે નવી પૅનલની રચના કરવાનો આદેશ આપ્યો છે. આ પૅનલમાં ટ્રાન્સપોર્ટ ડિપાર્ટમેન્ટના અધિકારીઓ, પોલીસ અધિકારી અને નિષ્ણાતોની સાથે ટ્રાન્સપોર્ટ અસોસિએશનના પ્રતિનિધિઓ પણ સામેલ રહેશે. પૅનલ પોતાનો રિપોર્ટ એક મહિનામાં સબમિટ કરશે.

ઈ-ચલાન ઉપરાંત સ્પીડ-લિમિટ અને પાર્કિંગના નિયમો બાબતે પણ આ રિપોર્ટમાં સૂચનો આપવામાં આવશે. પ્રતાપ સરનાઈકે જણાવ્યું હતું કે અયોગ્ય કે સખત દંડ ફટકાર્યા વગર ટ્રાન્સપોર્ટર્સને સપોર્ટ કરે એવી ટ્રાન્સપરન્ટ સિસ્ટમ ઊભી કરવાની જરૂર છે.

ઈ-ચલાન, નબળા ઇન્ફ્રાસ્ટ્રક્ચરની સમસ્યા ઉપરાંત ડિપાર્ટમેન્ટલ સમસ્યાઓને કારણે ટ્રાન્સપોર્ટની પ્રક્રિયામાં મુશ્કેલી થતી હોવાને લીધે પહેલી જુલાઈએ રાજ્યમાં તમામ પૅસેન્જર ટ્રાન્સપોર્ટ વાહનોની હડતાળ પર ઊતરવાની તૈયારી હતી. ગુરુવારે ઈ-ચલાનની સમસ્યાનો ઉકેલ લાવવા માટે સમિતિની રચના કરવાના નિર્ણય બાદ મુંબઈ બસ માલક સંઘટનાના મુરાદ નાઈકે હડતાળ પાછી ખેંચવાની જાહેરાત કરી હતી.