28 October, 2026 08:29 AM IST | Mumbai | Gujarati Mid-day Correspondent
ગઈ કાલે શહાપુરમાં ખેડૂતો.
ખેડૂતો, ખેતમજૂરો અને ગ્રામીણ શ્રમજીવીઓના પ્રશ્નો તરફ સરકારનું ધ્યાન દોરવા માટે ઑલ ઇન્ડિયા કિસાન સભાના નેતૃત્વ હેઠળ ગઈ કાલે અહિલ્યાનગર જિલ્લાના અકોલેથી રાજ્યવ્યાપી વાહનરૅલી-લૉન્ગ માર્ચ શરૂ થઈ હતી. મહારાષ્ટ્રના વીસથી વધુ જિલ્લાઓમાંથી સેંકડો ખેડૂતો વાહનોના મોટા કાફલા સાથે નાશિક જિલ્લા થઈને મુંબઈ તરફ રવાના થયા હતા. આ કાફલો મંગળવારે મોડી રાત્રે મુંબઈના આઝાદ મેદાન પહોંચે એવી અપેક્ષા હતી. એ પહેલાં જ શહાપુર પાસે એને અટકાવી દેવાયો હતો. દુકાળગ્રસ્ત ખેડૂતોને નૅશનલ ડિઝૅસ્ટર રિસ્પૉન્સ ફન્ડના નિર્ધારિત સ્ટાન્ડર્ડ્સ કરતાં વધુ સહાય કરવામાં આવશે અને નમો શેતકરી મહાસન્માન નિધિ સ્કીમના બે હપ્તાની ચુકવણી પણ તરત જ કરવામાં આવશે એવી ખાતરી સરકાર દ્વારા મળતાં ખેડૂત આગેવાનોએ એ મોરચો સમેટી લીધો હતો. જોકે આ બાબતે સઘન ચર્ચા હવે ૪ નવેમ્બરે થવાની છે.
