બોરીવલી સ્ટેશન પર શરાબી યુવકનો લવ ડ્રામા

પ્લૅટફૉર્મ પર આળોટીને યુવતીના પગ પકડીને તેને મનાવતો રહ્યો

વાઇરલ વિડીયોમાંથી સ્ક્રીનશૉટ

બોરીવલી સ્ટેશનની વેસ્ટ બાજુએ આવેલા પ્લૅટફૉર્મ પર નશાની હાલતમાં દેખાતો એક યુવક એક યુવતીના પગ પકડીને નીચે આળોટતો હોય અને તેને મનાવવાનો પ્રયાસ કરતો હોય એવો વિડિયો સોશ્યલ મીડિયા પર વાઇરલ થયો હતો. આ વિડિયો શુક્રવારનો હોવાનું માનવામાં આવે છે.

વિડિયોમાં કાળું પૅન્ટ અને બ્લુ શર્ટ પહેરેલો યુવક મોઢા પર દુપટ્ટો બાંધેલી એક યુવતીના પગ પકડીને આજીજી કરતો અને તેને મનાવવાનો પ્રયાસ કરતો જણાય છે. યુવતી યુવકનો વિરોધ તો નથી કરતી, પરંતુ તેને મચક પણ આપતી નથી એટલે બન્ને એકબીજાના પરિચિત હોવાનું માનીને આસપાસ ઊભેલા લોકો પણ હસ્તક્ષેપ કરતા નથી.

જોકે ઘણા સમય સુધી આ ડ્રામા ચાલુ રહેતાં આખરે મહિલા પોલીસ ત્યાં પહોંચે છે અને મામલો થાળે પાડે છે. પોલીસ યુવકની પૂછપરછ કરતી હતી ત્યારે તે નશામાં હોવાનું જણાતું હતું. જોકે તે યુવક વિરુદ્ધ કોઈ કાર્યવાહી કરાઈ હોવાનું રેલવે-અધિકારીઓએ કે પોલીસે જણાવ્યું નહોતું.