ટીનેજર સામૂહિક રેપ કેસમાં વધુ બે આરોપીઓની ધરપકડ

આ સાથે આ મામલામાં બળાત્કાર કરવાના આરોપસર ધરપકડ કરાયેલા આરોપીઓની સંખ્યા ૨૮ થઈ છે

પ્રતીકાત્મક તસવીર

ડોમ્બિવલીમાં ૧૫ વર્ષની ટીનેજર પર સામૂહિક બળાત્કારના મામલામાં પોલીસે ગઈ કાલે નવી મુંબઈમાંથી વધુ બે આરોપીઓની ધરપકડ કરી હતી. આ સાથે આ મામલામાં બળાત્કાર કરવાના આરોપસર ધરપકડ કરાયેલા આરોપીઓની સંખ્યા ૨૮ થઈ છે.

આ કમકમાટીભર્યા મામલાની તપાસ કરવા માટે એસઆઇટીની રચના કરવામાં આવી છે. આ ટીમનાં હેડ અને થાણેનાં એસીપી સોનાલી ઢોલેએ ગઈ કાલે માહિતી આપી હતી કે ‘ટીનેજરે પોલીસને ૩૩ આરોપીઓનાં નામ આપ્યાં છે. આમાંથી પહેલાં ૨૬ અને ગઈ કાલે બે મળીને અત્યાર સુધી ૨૮ આરોપીઓની ધરપકડ કરવામાં આવી છે. આમાંથી બે આરોપીઓ સગીર છે. બાકીના લોકોની તપાસ કરાઈ રહી છે. ટીનેજરની તબિયત સ્થિર છે. આરોપીઓ સાથે તેની ઓળખાણ સોશ્યલ મીડિયાથી થઈ હતી. આ કેસમાં હજી સુધી કોઈ રાજકીય કનેક્શન સામે આવ્યું નથી.’