23 February, 2026 08:40 PM IST | Mumbai | Gujarati Mid-day Online Correspondent
આદિત્ય ઠાકરે નાયબ CM સુનેત્રા પવારને મળ્યા
શિવસેના (UBT) ના નેતા અને મહારાષ્ટ્રના ભૂતપૂર્વ પ્રધાન આદિત્ય ઠાકરેએ સોમવારે સ્વર્ગસ્થ અજિત પવારની સ્મૃતિમાં આયોજિત પ્રાર્થના સભામાં હાજરી આપી હતી. તેઓ નાયબ મુખ્ય પ્રધાન સુનેત્રા પવાર અને તેમના પુત્ર પાર્થ પવારને પણ આ દરમિયાન મળ્યા હતા. આ પ્રાર્થના સભા અજિત પવારના મૃત્યુના લગભગ એક મહિના પછી યોજાઈ હતી. તેમનું 28 જાન્યુઆરીએ વિમાન દુર્ઘટનામાં અવસાન થયું હતું.
આજના બજેટ સત્ર દરમિયાન મહારાષ્ટ્ર વિધાનસભાના બન્ને ગૃહોમાં અજિત પવારને શ્રદ્ધાંજલિ આપવામાં આવી હતી. તમામ પક્ષોના નેતાઓએ તેમને એકસાથે યાદ કર્યા હતા, તેમને એક અનુભવી પ્રશાસક અને રાજ્યના રાજકારણમાં મહત્ત્વપૂર્ણ વ્યક્તિ તરીકે વર્ણવ્યા હતા.
મુખ્ય પ્રધાન દેવેન્દ્ર ફડણવીસે શોક પ્રસ્તાવ રજૂ કરતી વખતે કહ્યું હતું કે આ તેમના માટે ખૂબ જ ભાવનાત્મક ક્ષણ હતી. તેમણે કહ્યું હતું કે તેમણે ક્યારેય કલ્પના પણ નહોતી કરી કે તેમને અજિત પવાર વિશે આ રીતે બોલવું પડશે. ફડણવીસે પવારને તેમના નજીકના મિત્ર અને માર્ગદર્શક તરીકે વર્ણવ્યા હતા. તેમણે કહ્યું હતું કે તેમનો સંબંધ રાજકારણ સુધી મર્યાદિત નથી. તેમણે કહ્યું, "તેઓ ફક્ત મારા સાથીદાર જ નહોતા, પરંતુ જાહેર જીવનમાં મારા ભાગીદાર હતા." મુખ્ય પ્રધાને અજિત પવારની કાર્યશૈલીનો પણ ઉલ્લેખ કર્યો. તેમણે કહ્યું કે તેઓ શિસ્તબદ્ધ હતા, સવારે વહેલા કામ શરૂ કરતા હતા અને વહીવટી બાબતોની તેમને સારી સમજ હતી. ફડણવીસે નિર્દેશ કર્યો કે અજિત પવારે 11 વખત રાજ્યનું બજેટ રજૂ કર્યું છે અને તેઓ એક નવો રેકોર્ડ બનાવવાના હતા, પરંતુ હવે તે શક્ય બનશે નહીં. મહારાષ્ટ્રના નાયબ મુખ્ય પ્રધાન અજિત પવારનું ૨૮મી જાન્યુઆરીના રોજ બારામતીમાં થયેલ પ્લૅન-ક્રેશની દુર્ઘટના (Ajit Pawar Plane Crash)માં મોત થયું હતું. આ મામલે હવે રાજ્યના મુખ્યમંત્રી દેવેન્દ્ર ફડણવીસે કેન્દ્રીય ગૃહમંત્રી અમિત શાહ પાસે સીબીઆઇની તપાસ માટે ભલામણ કરી છે.
તમને જણાવી દઈએ કે ગઈ કાલે મુખ્ય પ્રધાન દેવેન્દ્ર ફડણવીસે એક પ્રેસકોન્ફરન્સને સંબોધતી વખતે જણાવ્યું હતું કે મહાયુતિ સરકાર અજિત પવારના પ્લૅન-ક્રેશમાં થયેલ મોતના તમામ પાસાંઓ જાણીને શંકાઓને દૂર કરવા માગે છે. રાજ્યના મુખ્ય પ્રધાન દેવેન્દ્ર ફડણવીસે એમ પણ જણાવ્યું હતું કે, "મને ભાજપના સહયોગીમાં રહેલ પક્ષ એનસીપી તરફથી પત્ર મળ્યો છે જેમાં વિમાન દુર્ઘટના (Ajit Pawar Plane Crash)ની સીબીઆઈ તપાસની માંગ કરવામાં આવી છે અને મેં ગૃહમંત્રી અમિત શાહ સાથે આ મુદ્દે વાત પણ કરી લીધી છે. ડીજીસીએ (ડિરેક્ટોરેટ જનરલ ઓફ સિવિલ એવિએશન) અને રાજ્યની સીઆઇડી ટીમ દ્વારા તપાસની સાથે સીબીઆઈ તપાસ માટે પણ વિનંતી કરવામાં આવી છે."
