16 July, 2020 12:09 PM IST | Mumbai | Agencies
પ્રતીકાત્મક તસવીર
ધારાવીમાં કોવિડ-19માં ગઈ કાલે વધુ ૨૩ કેસ નોંધાવા સાથે કુલ સંક્રમિતોની સંખ્યા વધીને ૨૪૧૫ થઈ હતી, જે લગભગ છેલ્લા એક મહિનામાં એક જ દિવસમાં નોંધાયેલા સૌથી વધુ કેસ હોવાનું પાલિકાએ જણાવ્યું હતું.
ધારાવીમાં લગભગ ચાર અઠવાડિયાં પછી પહેલી જ વાર ૨૦ કરતાં વધુ કેસ નોંધાયા હોવાનું બીએમસીના એક વરિષ્ઠ અધિકારીએ જણાવ્યું હતું. ૧૮ જૂનથી ધારાવીમાં રોજના નવા કોવિડ સંક્રમિતોની સંખ્યા ૨૦ કરતાં ઓછી નોંધાઈ રહી છે, અનેક દિવસો સુધી નવા કેસનો આંકડો એકાંકી પણ નોંધાયો છે અને સાતમી જુલાઈએ આ વિસ્તારમાં માત્ર એક કેસ નોંધાયો હતો. જોકે પાલિકાએ ગયા મહિનાથી ધારાવીમાં કોરોનાના મૃતકોની સંખ્યા જાહેર કરવાનું બંધ કરી દીધું છે.
એક અધિકારીએ જણાવ્યા અનુસાર ધારાવીમાં માત્ર ૯૯ ઍક્ટિવ કોવિડ-19 કેસ છે, જ્યારે કે ૨૦૬૭ દર્દીઓ કોવિડ-19ની સારવાર બાદ સાજા થઈ ગયા છે. ગયા અઠવાડિયે વર્લ્ડ હેલ્થ ઑર્ગેનાઇઝેશન દ્વારા ધારાવીમાં કોવિડ-19ના ફેલાવાને અટકાવવા અધિકારીઓ દ્વારા લેવામાં આવેલા પ્રયત્નોની પ્રશંસા કરવામાં આવી હતી.