બોરીવલી પોલીસે ચાર હજારમાં બનાવટી પૅન અને આધાર બનાવી આપનારની કરી ધરપકડ

પોલીસે આરોપીને રેડ હૅન્ડેડ પકડવા માટે એના પર ૨૫ દિવસ સુધી વૉચ રાખી હતી

બોરીવલી-વેસ્ટના અજંટા સ્ક્વેરમાં સાગર ફોટોકૉપીની દુકાન આવેલી છે (તસવીર : અતુલ કાંબળે)

બોરીવલી-વેસ્ટમાં ફોટોકૉપીની દુકાન ચલાવતો એક યુવક ૪૦૦૦ રૂપિયામાં બોગસ આધાર કાર્ડ તૈયાર કરી આપતો હોવાની માહિતી બોરીવલી પોલીસને મળી એ પછી પોલીસે આરોપીને રેડ હૅન્ડેડ પકડવા માટે એના પર ૨૫ દિવસ સુધી વૉચ રાખી હતી. એ પછી એ દુકાનમાં આધાર કાર્ડ બનાવવા માટે એક બનાવટી ગ્રાહકને મોકલ્યો હતો. દુકાનના માલિકે બોગસ આધાર કાર્ડની જ્યારે ડિલિવરી આપી ત્યારે પોલીસે તેની ધરપકડ કરી હતી. આરોપીએ આ પહેલાં કેટલા લોકોનાં આધાર કાર્ડ બનાવ્યાં છે એની પૂછપરછ પોલીસ કરી રહી છે.

પોલીસે જણાવ્યું કે ‘૨૧ ઑગસ્ટે સૂત્રો પાસેથી અમને માહિતી મળી હતી કે બોરીવલી-વેસ્ટમાં કોર્ટ પાસે અજંતા સ્ક્વેરમાં આવેલી સાગર નામની દુકાનમાં શ્યામ લોખંડે નામનો યુવક બોગસ આધાર કાર્ડ બનાવી આપે છે. એ પછી અમે ઘટનાસ્થળે વૉચ રાખીને એક બોગસ ગ્રાહક શ્યામ લોખંડે પાસે મોકલ્યો હતો. શ્યામે બોગસ આધાર કાર્ડ બનાવવા માટે પહેલાં પૅન કાર્ડ બનાવવું પડશે અને એ પછી જ આધાર કાર્ડ બનાવી આપીશ એમ કહીને ૪૦૦૦ રૂપિયા માગ્યા હતા. એ માટે શ્યામને ૨૫૦૦ રૂપિયા ઍડ્વાન્સ ચૂકવ્યા હતા. એ પછી શ્યામે કોઈ પણ ડૉક્યુમેન્ટ વિના પૅન કાર્ડ અને આધાર કાર્ડની ડિલિવરી ૧૩ સપ્ટેમ્બરે આપતાં પોલીસે રંગેહાથ ઝડપી તેની ધરપકડ કરી હતી.

બોરીવલીના એક પોલીસ અધિકારીએ ‘મિડ-ડે’ને કહ્યું હતું કે આરોપીએ આ પહેલાં કેટલા લોકોનાં આધાર કાર્ડ અને પેન કાર્ડ બનાવ્યાં છે એની અમે તપાસ કરી રહ્યા છીએ.