12 March, 2024 09:45 AM IST | Mumbai | Gujarati Mid-day Correspondent
દરેક રોડ-ઍક્સિડન્ટ અને ખાડા મૉનિટર કરવાની જવાબદારી બીએમસીની છે
રોડ પરના ખાડાઓને કારણે થતા અકસ્માત બાબતે કોર્ટે આપેલા આદેશ છતાં બીએમસી દ્વારા એનું પાલન ન કરાતું હોવાથી ઍડ્વોકેટ ઋજુ ઠક્કરે કોર્ટના અવમાનની કરેલી અરજી પર સુનાવણી કરતાં બૉમ્બે હાઈ કોર્ટે બીએમસીને કહ્યું છે કે દરેક રોડ-ઍક્સિડન્ટ કે ખાડાઓ અમે મૉનિટર કરીએ એ શક્ય નથી, એ જવાબદારી બીએમસીની છે.
હાઈ કોર્ટના ચીફ જસ્ટિસ દેવેન્દ્ર ઉપાધ્યાય અને જસ્ટિસ આરિફ ડૉક્ટરે એ પણ નોધ્યું હતું કે બીએમસી દ્વારા ગયા મૉન્સૂનમાં રસ્તા પરના ખાડા પૂરવા ૨૭૩ કરોડ રૂપિયાનો ખર્ચ કર્યો હતો એમ છતાં રસ્તાની કન્ડિશન સુધરી નથી. બીએમસી તરફથી કહેવામાં આવ્યું હતું કે મુંબઈના ૨૦૫૦ કિલોમીટર રોડમાંથી ૧૨૨૪ કિલોમીટરના રોડનું કૉન્ક્રીટાઇઝેશન થઈ ગયું છે અને ૩૫૬ કિલોમીટર રોડનું કૉન્ક્રીટાઇઝેશન ચાલી રહ્યું છે. એ કૉન્ક્રીટાઇઝેશન બાદ રસ્તા પર ખાડા નહીં પડે. કોર્ટે આગળની સુનાવણી ૧૫ એપ્રિલે રાખી છે.